周美欣走寶擦餐勁補數
藝人周美欣、歌手曹敏寶大嘆跟8,000萬六合彩「暑期金多寶」無緣，因她們所屬的經理人公司同事夾份以100元買六合彩，結果扑中三獎發橫財，未有落注的兩女笑言要同事請食飯：「冇財運都要有口福！」
前晚8,000萬六合彩暑期金多寶開彩，周美欣、曹敏寶所屬的公司同事成功以小博大贏得三獎，不過周美欣昨日在電話受訪時表示只有份戥人高興：「因為佢哋冇叫我一齊夾份買囉！其實我啲同事成日夾份買六合彩複式電腦飛，佢哋19個人夾咗100蚊買，結果中咗三獎，每人分4,000幾蚊。」問她可會呻笨？周美欣酸溜溜說：「好好運，我公司行運。」
泰國影泳照
周美欣又指一向很少買六合彩，自問沒有賭運，有時跟朋友打麻將亦多數做「魚腩」，不過她6歲時曾在加拿大發橫財，她得戚地說：「我試過買馬，用5蚊加幣亂點咗隻馬，點知跑第一，贏咗百幾蚊加幣，不過啲錢畀晒媽咪儲起。（會唔會屈同事請食飯沾旺氣？）我諗會有餐食，公司同事都對我好好，呢個月我生日，佢哋都幫我開派對慶祝，我仲同師弟吳智杰合照添。」另外，周美欣早前到泰國出席好友婚禮，在沙灘拍了一輯性感泳裝照，大晒完美身材。
曹敏寶冇賭運
至於曹敏寶則在電話中說：「我同周美欣講呢餐自助餐走唔甩，希望啲同事自動獻身表達心意啦。（請食自助餐就滿意？）唔通要每人送部車咩！」問她下次可會自動要求和同事夾錢再買過？自言天生沒有賭運的她笑言，農曆新年時會「賄賂」同事：「我會派大利是，希望啲同事有好嘢會益埋我。」
文：音樂組