周秀娜唔揀人夫拍拖
周秀娜被指與有老婆的電影監製行街睇戲，昨日她出席新片開鏡拜神時，承認與對方認識多年，不介意三人行睇戲，但強調不會揀有另一半的男士做對象。她笑言感情方面Dry到面部敏感，叫電影公司老闆開拍愛情電影給她「滋潤」。
周秀娜、張智霖（Chilam）、吳鎮宇及佘詩曼等，昨日於啟德郵輪碼頭出席新片《洩密行者》開鏡拜神。周秀娜日前被指與已婚電影監製黃永峰同行睇動畫電影，她大方承認，指與對方相識多年，亦一早知黃永峰已婚：「我來來去去都係嗰啲朋友，我喺橫店同馬來西亞拍戲個幾月，呢排先返香港。乜人都會約睇戲，都係普通朋友。」
想拍愛情片滋潤
問到以後會否避免與有婦之夫約會？周秀娜再次強調與黃永峰認識多年，不會特別避忌。她又稱不介意叫對方太太一同睇戲，因為她不會選擇有太太的人作為對象。
周秀娜自嘲單身多時「好Dry」，更指着面部表示皮膚敏感仍未痊愈。問到是否需要愛情滋潤？她笑說：「叫老闆開番套愛情片。（冇人追？）冇呀！都要畀時間人了解我。」她續稱今年忙拍電視及電影，朋友約食飯都要等三個月。
鎮宇唔識打拒獻醜
阿佘、鎮宇及Chilam一同接受訪問，Chilam大爆早前到馬來西亞拍外景時，鎮宇不怕中毒，食完榴槤再飲酒：「可能係佢先得。（你有冇試？）唔會啦！」
問到三人是否有不少動作戲？鎮宇笑言負責飛車及開槍：「我又唔係動作明星，打都無謂！」Chilam則稱會配合，鎮宇聞言笑說：「你都係動作演員，咁成龍係乜？」而阿佘於片中亦有飛車場面，她坦言感到害怕。
文：影視組