已故天后梅艷芳的母親覃美金（梅媽）有意租銅鑼灣區一單位作梅艷芳國際紀念館之用，日前梅媽聲稱該單位的業主謝偉俊及白韻琹反口拒租，更拒付違約金。昨日梅媽接受電話訪問時表示：「透過地產經紀，佢（白韻琹）第一次簽咗份臨時租約，仲收支票，之後佢話唔見咗租約再簽第二份，點知之後話唔租畀我，退番張支票塞喺我郵箱就算。（會考慮告對方違約？）我要同啲歌迷傾吓先。」言談間又指有人「欺負」老人家。其後再致電追問跟歌迷商議後的結果？梅媽說：「唔租，我咪租過第二度。」
白韻琹則多番強調：「根本冇諗過將單位租出去。（簽咗臨時租約？）嗰兩份係睇樓書嚟o架，嗰間地產公司喺我隔籬，唔想得失人哋。（梅媽話你收咗支票？）嗰日我食咗藥好攰，我唔係記得好清楚，但同梅媽冇任何租樓口頭協議。」
至於謝偉俊稱白韻琹所簽的確是臨時租約，但當日白韻琹精神狀態差，最重要是合約內的條文，即其單位不可作非住宅用途，加上他（業主）未簽字作最後落實，故法律上可不出租。對於梅媽自言被人蝦，他說：「我只係話梅媽唔接納我意見，佢可以告我，大家都知梅媽啲語氣，依家係邊個蝦邊個？（可跟梅媽道歉？）我只可以講，老人家平和啲，身體先健康。」