任達華海陸空影集喚醒春天
身為圈中攝影發燒友的任達華在即將舉行的書展，推出第三本攝影集，勉勵香港人「春天仍在」，希望喚醒大家沉睡的正能量！今次他出錢出力兼走遍全香港，以完成作品：「中環、石硤尾、長洲甚至荒蕪孤島都去過，用晒海陸空唔同角度拍出香港美態，想提醒香港人遺忘咗嘅情與景。我仲專登花咗兩日時間、租借老友王敏德揸嘅直升機高空影落嚟，太太知道後唔係咁鍾意，有少少微言，佢覺得咁樣（直升機上俯身拍照）好易出意外。」
「玩命」八號波拍攝
為求拍出自己想要的鏡頭，任達華更「玩命」於八號風球下向內地劇組請假返港，揸車到屋邨拍攝狂風暴雨的情景。他續說：「我斷斷續續用咗20日時間影相。我喺灣仔長大，今次為咗影相，我坐咗好多次電車來回，諗番起好多童年嘅回憶，亦發覺有部分景物不再，不過香港情依舊。」
任達華強調出書並非為賺錢：「如果有學校覺得需要嘅話，我好願意免費送書出嚟作教學用途。我覺得依家啲年輕人花太多時間喺科技世界，燃燒咗好多青春同光陰，應該多留意身邊嘅人同事，多啲關心自己嘅家同長輩。」
文：影視組
場地：The Luxe Manor