44歲影星「賓佬」賓艾佛力（Ben Affleck）日前與電視節目女監製Lindsay Shookus密會斷正，當大家以為他自與珍妮花嘉娜（Jennifer Garner）離婚後有第二春，Lindsay卻火速被爆四年前仍為人妻時，已撻着當時有老婆的賓佬，原來賓佬與新歡都是「小三」！
賓艾佛力與年長一年的珍妮花2015年宣布分開，但拖拉到今年4月才正式離婚，男方大前日被拍到與《周末直播》（Saturday Night Live）37歲女監製Lindsay外出撐枱腳爆新戀情，但女方火速被起底，更被爆原來是「小三」！
據美國雜誌《People》引述內幕人士透露，賓佬與Lindsay早於2013年開始偷食，當時各自有另一半，賓佬與珍妮花仍未分開，而Lindsay的老公則為《周末直播》監製Kevin Miller，知情人士說：「賓佬與Lindsay為偷食不時飛嚟飛去，多數喺紐約見面，佢哋成日都去同一間酒店，基本上係『常客』，當時佢哋都結咗婚，只要賓佬一飛嚟紐約就會密會偷食，其他地方亦一樣。珍妮花同Kevin幾乎喺同一時間2015年發現佢哋偷食，相當傷心！」
據悉賓佬與Lindsay偷食期間不時開房，更會互發短訊調情，一有機會就見面，但關係僅維持三個月，有傳珍妮花與賓佬的婚姻問題多多，男方偷食僅為其中一個分開原因，二人最終於2015年宣布結束十年婚姻，今年才辦手續處理。至於Lindsay與Kevin的婚姻亦在她偷食不久結束。
文：外娛組