朱茵恩愛捧場 黃貫中父女夾band呻冇癮
黃貫中前晚偕樂隊Kolor等開騷，他坦言初時叫老婆朱茵不要前來，因擔心喇叭聲浪太大，但多謝太太堅持撐場，相反他不想囡囡睇騷，因怕自己心散，又笑言跟四歲女兒夾band冇癮！
歌手黃貫中（Paul）、樂隊Kolor、秋紅及Cassette前晚在九展開騷，Paul老婆朱茵亦有捧場。眾單位輪流表演後大玩crossover，場面high爆。期間Paul表示近年不少音樂人輪流上了天堂，之後唱Beyond的《歲月無聲》，而Paul則負責彈結他。演唱會尾聲時Kolor主音Sammy的老婆盧巧音亦上台合唱，最後以《無得比》作結。
黃鶯掛住食薯片
Paul騷後受訪時談到老婆捧場，他表示最初因擔心台前喇叭聲浪大，叫對方不要來：「提佢要避開，但佢一定要嚟，多謝佢。」談到囡囡黃鶯沒有到場，他說：「費事啦佢太細，又鍾意撥開headset，顧住佢又驚心散。」他謂上次開騷囡囡有來睇：「佢都唔知發生咩事，淨係戴住headset食薯片。」雖然囡囡喜歡音樂，但Paul笑言跟對方夾band冇癮：「佢會搶走我嘅結他同琴，畀佢個玩具結他我，但冇所謂，識欣賞音樂我就安慰。」
Kolor大讚演出好玩，盧巧音亦說：「其實之前佢哋綵排我已經心思思，暗地裏揀咗歌，之後問過Paul佢都話一齊玩。（唱兩首唔夠喉？）留番下次嘛。」而問到Kolor何時舉行演唱會？他們表示應該明年開騷，Sammy笑說：「冇錢搞，上次蝕到入骨。」他們又指即使賣出八、九成門票，只勉強達到收支平衡。
文：音樂組