兩大女神級奧斯卡影后珍妮花羅倫絲（Jennifer Lawrence）與妮妲莉寶文（Natalie Portman），前日於巴黎時裝周性感撐代言品牌時裝騷，瞓身透點及谷奶晒巨胸搶鏡，「胸猛」上陣完勝多位亞洲明星！
26歲的珍妮花前日與眾星齊撐國際品牌的秋冬高訂時裝騷，作為代言人的她愛靚不愛命，懶理天氣酷熱，着上勁悶焗的針織外套配長靴，睇到都覺得熱。不過原來她內有乾坤，內穿透視短裙真空上陣，近鏡更大方透點，堅透心涼！至於另一影后，36歲的妮妲莉更搏到盡，3月剛生完第二胎的她自產後首次現身公開活動，着上超Deep V黑色短裙示人，未算收身成功都拋出谷奶上圍吸睛。至於康城影后姬絲汀鄧絲（Kirsten Dunst）亦加入「胸湧」行列，搶盡同場行青春性感或晒貴氣的亞洲星「峰頭」！
同場的Angelababy與章子怡、劉嘉玲及黃軒等齊齊睇騷，產後收身成功的Baby以牛仔連身裙大晒Fit爆身材。至於章子怡與劉嘉玲就同以All Black造型示人，大晒優雅貴氣，與設計師留影時氣場十足！此外，同場還有韓國女星孔孝真及時裝達人黃偉文。
眾星騷後轉戰品牌70周年展覽及慶祝派對，珍妮花「醒水」換上「涼浸浸」的低胸流蘇透視裙，晒玉背之餘更放送打底「Boxer」及超長美腿，清爽又養眼！至於索模Bella Hadid亦以透視黑裙騷Fit爆身材，晒事業線及「優質股」。Angelababy與妮坦莉同樣換上白裙現身，Karlie Kloss及羅拔柏迪臣（Robert Pattinson）齊齊鬥Chok，而近期少有出席時裝活動的「粗眉模」Cara Delevingne亦有捧場，場面星光熠熠！
文：外娛組