黃子華冇嘢撈幫蘇永康做陪月
蘇永康（蘇康）與太太馮翠珊（Anita）前晚於灣仔一間酒店為囝囝蘇展弘（Jazz）補擺百日宴，筵開11席，圈中好友張衞健、梁漢文、許志安、容祖兒、車婉婉與囝囝BBQ等出席。身為Jazz契爺的黃子華亦有現身，送上嬰兒孭帶做禮物，他大讚Jazz大隻及好湊。提到蘇康指他一抱Jazz，就可以令Jazz不再哭，子華笑說：「冇錯，因為我嘅兼職係一個陪月，近來我冇咩做，就係做陪月！（送孭帶？）因為佢已經16磅喇，單手、雙手抱都好攰，所以係時候用呢啲嘢。人類係生長得好快，佢個仔已經好重。」問他可想生一個？他說：「仲問呢啲？見到佢（Jazz）已經好開心。」
好彩囝囝唔百厭
蘇康獨自出來受訪，向大家展示兩張相片：「一幅係1967年我阿媽抱住我，另一幅係2017年我阿媽抱Jazz。」又透露當年他在同一酒店擺滿月酒：「因為我爹地以前喺度玩音樂，我揀番呢度係想有個意義，紀念我爹哋。」成為人父的他笑言幫囝囝換片冇難度：「呢啲基本動作，我哋冇請陪月，工人又要瞓，夜晚十點後都係我主力，佢都幾乖仔嘅，好彩生到個仔唔百厭。」
另外，車婉婉在社交網上載囝囝BBQ與Jazz拖手照，她指與Anita及BB合照時，兩個BB突然「自動波」拖手，似乎已展開友誼，非常可愛。
文：音樂組
攝：劉智源