莊思明玩Live激嬲男友 劉佩玥變身Miss教中文
劉佩玥昨日與一班藝人在街頭直播Jam歌，曾多次開Live的她直言最怕有人點唱《帝女花》、《將軍令》等「神曲」，更預告將來會扮Miss玩誘惑授業！而莊思明就表示直播零化妝的男友楊明時被他鬧爆，認真陰功！
藝人劉佩玥（Moon）、莊思明（Lisa）和翟威廉（William）等昨日在油塘出席無綫「big big channel」流動直播車出巡活動，於車上開Live齊齊Jam歌，引來大批途人圍觀。
點唱被挑機
與同場藝人組成「Happy Live」的Moon笑指之前直播時有不少網友提出特別要求：「最驚人點《帝女花》，又有人會點《將軍令》。（有唱？）呢個好難，要練，仲有人挑機點《梁山伯與祝英台》，我梗係接受挑戰用鋼琴彈出嚟。」問會否試其他形式的直播？她指想與其他藝人玩遊戲：「輸咗會接受大懲罰。（除衫？）尺度唔可以咁大，好多中小學生睇！都可能會教中文，教吓創作。（着Miss衫？）着到好似Miss咁，戴埋副眼鏡！」
鬼祟肉肥咗
問Lisa直播時有否出動男友楊明？她笑指當時被對方鬧爆：「佢話『咦，唔好影啦！』（事後話番佢？）佢話『你試吓冇梳頭冇化妝Live到你，你嬲唔嬲？』」但指楊明其實平時笠頂帽便會出街，不是太過着重儀容。問到會否直播跳舞？她稱怕嚇走粉絲，更謂自己最近肥在鬼祟的地方，不敢以泳裝直播。
至於William就指自己在「Happy Live」中擔任統籌，問他會否出怪招突圍？他說：「算啦，我份人都唔Funny。（直播你同啲女朋友一齊？）我淨係招呼周志文、周志康已經好唔得掂！」
文：影視組