留守橫店作戰到底 劉心悠 蕭正楠深宮啜爆！

無綫劇集《宮心計2深宮計》於橫店的外景部分已接近尾聲，胡定欣、陳煒、周秀娜等已先後煞科返港，僅剩下馬國明、黃心穎、蕭正楠、劉心悠等少數演員趕工，基於當地天氣不穩定，經常下大雨，令拍攝進度稍為受阻，劇中演宮女的心悠，既要應付打戲及吊威吔，又要與Edwin談情，日前兩人便上演一場接吻戲。

吊威吔猛嗌好玩

面對名草有主的Edwin拍咀戲，心悠未感尷尬：「同Edwin有唔少類似戲份，好在唔係一開拍就拍，可以先培養默契，所以呢場Kiss戲，大家好快完成，冇NG，一Take過添！至於拍吊威吔好好玩，同平時拍電影吊威吔感覺好唔同，我一直想挑戰動作戲，都好期待出嚟嘅效果。（橫店拍攝順利嗎？）都可以，好搞笑，同啲演員鬥快殺青，我諗都係我同Edwin留到最後。」

與劇組相處多個月已建立友誼，煞科在即心悠坦言不捨，回港後她要出席活動及還廣告債，完成所有工作才有兩星期假期。

劉心悠、蕭正楠咀慣咀熟，一Take收貨。

蕭正楠策騎演出。

唔使向翠如備案

剛完成廿小時拍攝的Edwin，聲線疲倦的接受本報訪問，他透露劇中與心悠雖然有不少咀戲，但古裝劇不會很激情，問到可有向女友黃翠如「備案」？Edwin只說：「都只係蜻蜓點水多。（包尾殺青？）我同心悠鬥到最後，未知鹿死誰手，不過Lady First，我做最後都冇所謂啦！（返嚟可以休息吓？）冇啦！因為新劇《超時空男臣》月中播，到時都要宣傳，冇所謂，我都希望呢套劇喺暑假有好嘅收視。」

（左起）蕭正楠、施駿喆、黃耀煌、姚宏遠、朱匯林 蕭正楠與四位「小鮮肉」齊齊落水露點。

羅霖（右）與同劇的劉心悠、謝雪心及康華等合作愉快。

文：影視組