畀阿Sa詐型 阿嬌自認「飛機王」
Twins在新歌《失約》MV中，穿上日本劍道服拍攝，劇情指男主角是日本劍道教練，三人齊齊上課。此畫面令Twins勾起不少回憶，因多年前曾遠赴日本拍攝寫真集，當時也有日本劍道造型，阿嬌說︰「不過當時只係擺吓甫士，冇咩機會學，今次反而可以試玩一陣。」
聚會懶得出
談到歌名《失約》，兩位好姊妹互爆大鑊。問到可有試過失約？阿Sa聽到後暗暗冷笑，阿嬌即搶認︰「主要係我放飛機！」阿Sa笑說︰「好彩你自己認……」更爆料指每次與大班朋友聚會，必定約實阿嬌，但對方很多時在聚會前一刻，才通知大家不能來，令聚會時的合照往往缺少一塊。阿Sa沒好氣說︰「當我Post大合照到社交網時，大家就會不厭其煩留言追問︰『阿嬌呢？阿嬌呢？點解唔帶小嬌嬌出街呀？』」知衰的阿嬌直認確有此事，自嘲︰「主要係我太懶，經常放飛機，做飛機王。」
真friend唔會嬲
阿嬌笑言放得人「飛機」多，終有被放飛機的一日，原來她亦曾被阿Sa放過一次飛機，但兩人已經不記得詳情，阿嬌說︰「只記得當時剩低我一個人，孤伶伶喺銅鑼灣街頭，好可憐。」不過阿Sa笑說：「大家識咗咁多年，從來都唔會為呢啲事而嬲對方，呢啲嘢都嬲，就好難做朋友！」
文：音樂組