趙哲妤養B慳住使30萬新車齋睇
單親媽媽趙哲妤（Uny）獨力照顧女兒Natalie，一向自給自足的她跑車座駕壞了，又想BB坐得安全又舒服，為了慳錢，Uny嘗試向被爆投資有道的媽咪借價值80萬新車揸，卻被媽咪拒絕，惟有另覓新車，但都齋睇冇幫襯。
趙哲妤去年因未婚生女而與媽媽不和，一度遷出趙家，獨自搬到荃灣居住，但產後雨過天青，母女並無隔夜仇，Uny已搬回趙家與媽媽同住，趙母更樂於湊外孫女。趙母日前被爆投資有道，持有超過十個物業，涉獵的生意十分廣泛，有首飾、餐廳等，最近更買了價值80萬新車。雖然有富貴媽咪，但Uny向來保持低調，甚少談及媽咪，她不想因為自己是藝人而影響媽咪，加上自細媽咪已教她投資及自給自足，Uny即使產後要照顧女兒開支甚大，又斷絕與B女爸爸聯絡，生活捉襟見肘。
帶埋BB車試車尾箱
近日見Uny甚少駕駛代步跑車，原來是座駕壞了，媽咪又拒絕借出新車，為了Natalie出入安全舒適，Uny就想買大型車，所以打算將座駕賣掉，多除少補，為了囡囡一於慳住買車！日前Uny推住粉紅色BB車現身銅鑼灣一間車行，但未見BB在車內，只見她一進車行就與男售貨員密密傾，她對新出價值約30萬的旅行車情有獨鍾，左試右試之餘，更將帶來的BB車放入車尾箱試位，似乎買車是為了方便接送BB。
平日Uny揸靚跑，想不到會為BB改買旅行車，只見她跟售貨員外出試車15分鐘，落車時笑容滿面，雖然當時下起毛毛雨，她仍眼定定望住新車，要售貨員呼喚才回過神來步入店內，之後售貨員落足嘴頭，但Uny不斷用手機計數，皺晒眉頭，似乎價錢未合心意，最後齋試冇買。據知Uny左計右計，覺得新車落地冇三成，打算改睇二手車！
文：名人組