陳國峰緊張大師親試泵奶
快將榮升爸爸的陳國峰，日前與懷有六個多月身孕的太太到銅鑼灣選購嬰兒用品。他更「奶爸」上身親試孭帶，又同老婆一齊研究奶樽、奶嘴及BB床等，之後更連泵奶器都唔放過，要拎上手一試手感！
「巨聲幫」隊長陳國峰（Penny），去年3月與拍拖8年的圈外女友黃思雅（Wing）註冊結婚，於同年11月補擺婚宴，更請來林盛斌（Bob）、梁烈唯、范振鋒及吳業坤等任兄弟團，可見圈中人緣甚廣。Penny婚後積極造人，很快便一索得男，太太現已懷有六個多月身孕。
睇孭帶BB床
快將榮升爸爸的他，日前下午5時半，與腹大便便的太太在銅鑼灣選購嬰兒用品，平日大大隻的Penny還「奶爸」上身，周圍試BB用品。現場見兩公婆有傾有講，未幾Penny分別拿起兩條孭帶親自試上身，還孭住在店內周圍走，且不時給予太太意見，之後又同老婆一齊挑選奶樽和奶嘴，然後轉睇BB床。期間老婆在揀選泵奶器時，Penny似乎大感好奇，並即時拎上手揸兩下試手感。試完一輪，兩公婆已購下心水戰利品，恩愛地手拖手離開。步出時見記者拍照，兩人亦禮貌地笑笑口打招呼。
冇被林敏驄嚇窒
至於早前林敏驄以嘉賓身份錄影無綫節目《Big Boys Club》，在節目中多次掌摑兼狂窒主持人Bob，令執生經驗豐富的Bob亦招架不住，火藥味濃。近日兩人再次碰頭錄影宣傳片，主持之一的陳國峰未知是否被林敏驄嚇怕而缺席，記者就此致電Penny，他解釋：「咁啱嗰日要開工錄歌。（被阿驄嚇窒？）唔會，玩吓啫！畀佢寸兩句OK嘅，我唔敢寸佢啫！佢轉數咁快，反而有助我轉數快啲，當實習。」
文、攝：追蹤組