盧頌之戒蒲湊女冇得瞓勁忟
藝人盧頌之（DaDa）今年3月為男友趙勁皓（King）誕下囡囡「踢踢」趙安嵐。二人昨晚為女兒設宴十五圍舉行百日宴，一家三口穿上牛仔布家庭裝亮相。問到DaDa是否已經習慣當媽媽，她表示：「依家瞓四個鐘就要起身，比想像中辛苦。囡囡一扭計就會喊，我就會忟，覺得好煩。不過每朝起身見到佢笑，好似識同你打招呼咁，就覺得辛苦都值得嘅。」
年底日本註冊
而King表示有幫手湊女，會幫囡囡換片、沖涼及餵奶：「早前忙拍劇、為形態健美比賽操練同處理酒吧業務忙咗啲，不過依家我唔返酒吧，想放多啲時間照顧囡囡。」他表示稍後要應付健身比賽，之後便會「金盆洗手」陪囡囡。而DaDa亦說為了「踢踢」，少了出街不再貪玩：「啲人話小朋友3歲前要多啲陪佢哋，之後佢哋就有自己朋友。」問到二人何時正式註冊，King表示胞弟年底會在日本拍婚照，家人將會同行，故計劃屆時在當地與DaDa註冊結婚：「唔想喺香港咁高調，所以今日都係人少少食餐飯。（會唔會追多個？）想生個仔，可以繼承我運動嘅衣缽，但過多兩、三年，等個女大啲先。」
陳柏宇留定BB衫
歌手陳柏宇與未婚妻符曉薇（Leanne）亦有出席百日宴，陳柏宇笑言一直有送服飾給「踢踢」作禮物：「我叫佢哋唔好丟。（留番畀你啲仔女？）係呀，代代相傳嘛，希望唔會等好耐。（如果你生仔呢？）冇所謂，男同女睇唔出嘅！」談到他與Leanne的婚禮是否準備就緒？他說：「啱啱先開完會傾細節，賓客名單、座位已經印咗出嚟。」
另外，藝人鄧洢玲亦有到場，她表示DaDa性格貪玩，沒想到她這麼快生小朋友，認為母愛很偉大，生完小朋友後DaDa亦定性很多。
文：專案組