蔡思貝擬拍賣有味假哨牙
蔡思貝、李佳芯及陳庭欣等藝人昨日殺入旺角宣傳新劇及big big channel啟動，期間多次落雨，但一眾Fans仍冒雨撐偶像，眾星表示感動又心痛！思貝透露有意將劇中的有味假哨牙拍賣，籌募善款！
李佳芯（Ali）、蔡思貝、王浩信、張振朗、陳庭欣、翟威廉、譚凱琪及蔣家旻等，昨日到旺角鬧市出席《big big channel 6.23全球體驗啟動儀式》暨劇集《踩過界》宣傳活動，宣布市民已可免費下載big big channel應用程式，引來大批途人及Fans包圍，眾藝人在宣傳車上進行網上直播，期間不時有驟雨，一眾Fans逼在行人路上硬食雨水，支持偶像！
活動後思貝及Ali均表示心痛粉絲淋雨，Ali說：「戥大家慘，估唔到天氣咁。（驚唔驚出師不利？）唔會，貴人出門呀！知道有Fans嚟撐我，好有心，錫晒佢哋。」問到會否在big big channel表演其「出色」歌藝報答Fans？Ali笑說：「仲記得咩？我努力練習緊，總有一日會回歸唱歌嘅舞台。（再唱《小幸運》？）未必，仲有好多歌我要挑戰。」
陳庭欣翟威廉「雀仔按摩」
思貝則考慮在網上拍賣角色所戴的假哨牙做善事：「呢棚牙同我身經百戰四個月，好有意義，希望義賣籌到錢。」問會否洗乾淨才拍賣？Ali笑言可能Fans「鍾意陣味」，而思貝就笑說：「洗唔洗就睇對方要求啦！（叫你緋聞男友麥秋成買？）唔會要求人，自己鍾意買就買。」
緋聞情侶陳庭欣及翟威廉不停耍花槍，威廉提議庭欣送出她三隻雀仔寵物予Fans，庭欣說：「可以送羽毛，同埋佢哋啲裸照、出浴片段。（送你自己嘅出浴片？）咁就要睇收視啦！」威廉指她在《踩》劇中有全裸鏡頭，身材值得留意，即被取笑平日睇唔少！問兩人會否在網上節目crossover？威廉說會邀請庭欣的雀仔唱歌，庭欣更爆趣指可以表演「雀仔按摩」！
文：影視組