周秀娜拍戲韌帶發炎歎皇帝級待遇

昨日周秀娜（Chrissie）出席《快易通會員獎賞計劃》啟動禮，在台上與主持分享駕駛蝦碌史：「試過喺迴旋處被困3小時，係咁轉，想出番去又出唔到，永遠去唔到自己想去嘅地方，但依家好啲囉，2個鐘就得。」之後又與星級魔術師張哲銘一同表演三個魔術，獲對方力讚是可造之材，可成為「魔術女王」。

隨時有櫈坐

忙於拍戲及拍劇的Chrissie透露，剛從佛山拍攝電影回港，日前拍動作場面後發現雙腳又紅又痛，而且愈來愈嚴重，她說：「睇完醫生，食咗幾日藥，維持咗都4、5日，我都好擔心，諗緊係咪關韌帶事，有幾次因為坐完飛機、坐車坐得太耐，血液唔循環搞到咁，但未試過今次咁兩隻腳都有事。醫院檢查完發現韌帶發炎，開頭仲驚係咪畀蟲咬到，因為個地方係樹林嚟。（有冇影響拍攝進度？）冇呀，我覺得好似皇帝式享受咁，大家隨時變到張櫈出嚟，因禍得福，又可以轉着波鞋。（暫時唔着得高踭鞋？）依家都未完全好番，之前腫得好犀利。」

周秀娜與張哲銘合力表演魔術，獲讚有潛質。

周秀娜昨日出席啟動禮亦以波鞋上陣。

想留港置業

留港一日，Chrissie今日又起程到馬來西亞拍電影，她表示很高興可以跟張智霖、吳鎮宇合作。提到很多人因為便宜而到馬來西亞買屋，她說：「喺香港置業太貴，好難上車，如果其他地方，我覺得最重要係負擔得到。（有咩心水地方？）我想留喺香港，心水？咁不如深水灣啦！」

文：名人組