江若琳想生4件5條King護駕

歌手江若琳（Elanne）以一身寬鬆間條睡衣look現身東網巨星節目「海馬牌床褥特約」《閨蜜睡房》，外表甜美的她自言是豪邁女生，但在朋友眼中卻是個「論盡」兼大頭蝦的人，經常遺漏隨身物品在不同地方。

嗲功一出乜都掂

聲線嬌嗲的Elanne，私底下是否個懂得撒嬌的女人？她聞言即說：「如果有事要幫忙嘅話我就會變聲，成功率高達99%，同事就話我係人肉聲控器，不過對住屋企人同另一半就唔會撒嬌，覺得好惡心！」

江若琳與Oscar打得火熱，有Plan結婚。

江若琳與節目主持Kiwi在閨房談心事。

主持李惠儀（Kiwi）跟Elanne玩二揀一選擇題時，問到她喜歡高大型還是大隻男？她即貪心話最好兩樣都要，其男友Oscar（蕭潤邦）就是這個類型，未知他是否因為這個條件成功攻陷Elanne的心呢？問到事業、愛情會怎樣選擇，她選擇以事業為先：「但都會計劃成家立室，女人最後都係以家庭為重，希望有自己家庭同小朋友，但我仲有夢想，身邊有個人陪我追夢覺得好完美！（有冇傾過幾時結婚？）認定對方嗰刻都希望行到最後，呢樣大家有共識。」談到生B，Elanne揚言最理想是生四個男丁，更幻想將來四個仔加老公在身邊，就像有五個保鏢保護自己。

被人攻擊學睇化

今年入行第十個年頭的Elanne，自爆這些年經歷了高低起跌，但目前是最快樂的，回顧初入行時，有經理人保護自己，但投身社會就要學懂接受不同的聲音，承認有段時間心情非常低落：「就算好循規蹈矩，總係會有風浪招架唔到，點解我咁努力都冇咩人鍾意？甚至畀人攻擊，但原來睇化咗就完全冇呢啲，可能真係長大咗啦！」

文：音樂組