以為名人紅星愈紅愈養尊處優？非也，紅到好似54歲的湯告魯斯仍然密密挑戰玩命動作場面，玩勻海陸空，於新作中更預埋拍檔挑戰半空零重力拍攝拍到嘔，可算是多年來「玩命之最」！
靚佬湯前年拍《職業特工隊：叛逆帝國》（Mission Impossible： Rogue Nation，簡稱《職5》）徒手爬上準備起飛的飛機，隨之飛上5,000呎高空，雖然有威吔綁實，但脆弱的眼睛就要靠可抵抗強風的特製隱形眼鏡保護，拍攝史無前例，連靚佬湯都話：「真的好驚！如果不幸出事，我亦只可等飛機着陸才獲救援。」
湯告魯斯，一個影迷細細個就聽過的名字，出名夠搏的他於主演的《職業特工隊》（Mission Impossible）電影系列打造多個經典動作場面，近期參演重拍的大製作《盜墓迷城》（The Mummy）亦有招牌玩命演出，震撼粉絲眼球！
年過半百的靚佬湯主動要求為真實感而棄用CGI，更親身於裝置在液壓吊架兼不斷旋轉的20噸貨機中進行零重力拍攝，攬着女主角Annabelle Wallis由地板彈上天花板再跌落地，化身人肉安全墊，而且於連串動作之間「交戲」及準備應付意料之外的道具橫飛，最後拍足64個Take才收貨，Annabelle與攝影師嘔個不停，靚佬湯還自言大家要小休嘔清再拍！電影成本高達9.7億港元，相信用於保險都唔少。
靚佬湯於《職業特工隊2》（Mission Impossible 2）中，在猶他州大峽谷國家公園與拱門國家公園之間的山岩徒手攀石，親身完成所有攀爬及半天吊場面，連導演吳宇森都話怕靚佬湯由2,000呎半空墮下，靚佬湯為求完美，更親身拍埋跳懸崖，搞到肩膊撕裂！
靚佬湯愛玩水，除了前年於《職5》深入水底閉氣逾6分鐘，早於拍第一集《職》時，已親自埋位拍巨型魚缸爆炸特技場面，被水與玻璃淹沒，特技演員都被割傷，幸而靚佬湯僅傷及足踝。
靚佬湯於現實生活中有機師牌，高中時期做過摔跤手，堅係周身刀！他更是真英雄，於1998年在倫敦救被搶劫的女子，窮追施襲者；1996年他見到有女子被車撞倒，陪入院兼支付約5.4萬港元醫療費用，堅為親民巨星！
靚佬湯連牙煙飛車戲都堅持賣命唔用替身，大前年於《異空戰士》（Edge of Tomorrow）中，女拍檔Emily Blunt揸車狂飆，懶理身旁的靚佬湯狂叫「煞車」，最後意外撞樹，險令靚佬湯「歸西」。此外，靚佬湯早年拍《同行殺機》（Collateral）坐上占美霍士（Jamie Foxx）駕駛的快車，搞到頭撞天花兼成個人跌落地。