克勤醋夫上身驚老婆被睇蝕

歌手李克勤將於9月假紅館舉行《李克勤慶祝成立30週年演唱會》，由於內部購票反應非常熱烈，昨日克勤在記者會上宣布由4場加開至6場，即9月4日至9日舉行，門票昨日公開發售。截至昨午5時許，最平的280元門票已被掃清，最貴的780元門票只剩小量單丁位。

記者會上，司儀問克勤可會邀請前港姐冠軍的太太盧淑儀戴后冠上台繞場一周，此時台下有人大叫「着泳衣」，克勤即嚇到眼凸，並即落閘說：「邊個講着泳衣？唔係年齡嘅問題，但幾十年前已經蝕咗一次，唔好啦！實不相瞞，我好介意，唔好搞呢啲！」

笑兒子唱功未達標

受訪時，克勤表示再加場的機會是五十五十，因接着有其他歌手演出，現與對方接洽中。講到不准太太穿泳裝上台，克勤說：「要過我嗰關先，梗係過唔到啦！呢啲嘢畀人睇一次就夠（選美泳裝環節），嗰時我未有話事權，未到手。（淨係上台呢？）唔會，我唔容許唔識唱歌嘅人上台。」提到兩名兒子會唱歌，克勤即透露曾以吹水形式問過兒子可想上台：「但依家啲水平好高，最近有個9歲嘅（譚芷昀Celine）唱得好叻，所以唔好喇，佢哋唔夠水平，但佢哋會嚟睇。」

克勤獲送上新專輯的黑膠唱片版及肖像紀念郵票。

水晶球上播出克勤三十年前參加歌唱比賽的片段，令他大呼尷尬。

炮製新版《舊歡如夢》

另外，克勤前晚於網上玩直播讓歌迷點唱，雖然事先講明不想唱《舊歡如夢》，即使有點唱亦會扮看不見，但依然有眾多歌迷點唱該曲，連圈中好友容祖兒、周慧敏、徐濠縈、劉浩龍等亦加入叫克勤「找數」，克勤在群眾壓力下終屈服，但未有重現當年歌曲MV中的經典趷趷舞。克勤昨日提到此事時，笑言覺得被整蠱，但亦透露希望在個唱上演繹一個全新版本：「講真，我唔係介意唱呢首歌，但當年好笑嘅嘢，30年後再拎出嚟唔一定好笑，所以希望用依家嘅我去演繹，希望有新意。」

文：音樂組

攝：李伯儒