李克勤舊歡噩夢 唔敢亂Un
歌手李克勤即將舉行入行30年演唱會，他笑言會對舞蹈風格獨特的《舊歡如夢》避之則吉！但他指此曲並非歌唱事業瑕疵，反而是其轉捩點！
歌手李克勤、泳兒、洪卓立、吳業坤、王灝兒（JW）及連詩雅等，前晚在電視城為《明愛暖萬心》演出，克勤表示會搞Facebook Live點唱慶祝父親節，他說：「乜歌都點得，但《舊歡如夢》，我會當時運高，睇唔到。（怕跳嗰隻舞？）留番9月演唱會，邊度跌低，邊度起身！」
怕破壞華麗氣氛
克勤昨日透過短訊回覆：「我唔覺得首歌係瑕疵，我好認真正經唱o架，記得嗰時由資深導演小美仲喺TVB時拍呢個MV，佢話想懷舊、搞笑，其實好多謝呢隻歌，原來大家喜歡克勤搞笑，同時期又出咗好多克勤搞笑節目，由悶蛋變開心李克勤，係好大轉捩點！」他又解釋演唱會怕唱的原因：「因為『Un吓左、Un吓右』嘅舞可能會娘，破壞演唱會華麗氣氛，請觀眾上台玩就唔拘！嚟緊個唱諗緊以喜出望外方式唱，同排舞傾緊，唔知做唔做到，但我會勇於嘗試。」
吳業坤錯字勿心邪
同場的吳業坤則為網上再爆新錯體詞語「好想釣人食飯」解釋：「除咗『食好西』係唔小心，其他都係想同大家放鬆吓，有啲打錯都冇改，不過一睇就明，除非心邪！」泳兒則指正受皮膚敏感困擾。而JW透露獲男友及一班朋友為她提早慶生。
文：影視組