黃智賢‧知足遊戲人間
黃智賢入行廿多年，於無綫出身的他一度外闖見世面，當重返公司時已由當年的清水灣電視城變為將軍澳的電視廣播城，一切都重新開始。當年與他同期的小生、男主角大多向外發展，但黃智賢自喻為股票，適宜長期持有，安於留在無綫：「我唔需要大富大貴，對於自己擁有嘅都好滿足，閒時會同老婆向我哋嘅小目標計劃吓！」
有口碑嘅，十年咪十年囉
入行不經不覺已28年的黃智賢（Ben），直至現時仍有很多人一見他便叫他「阿海」（劇集《真情》的角色）。由兒童節目《閃電傳真機》做主持開始，Ben捱到1997年才於劇集《真命天師》中擔任男主角，但兩年後毅然離開無綫返內地拍劇，亦曾加盟亞視參與劇集演出。2005年，Ben選擇重返無綫，並一直效力至今，2011年憑劇集《潛行狙擊》一角於台慶頒獎禮奪得「男配角」獎項，現時所接的劇集都是演男主角，例如《四個女仔三個BAR》、《波士早晨》、《親親我好媽》與《雜警奇兵》等，備受公司重用，大有發揮。
十年前，Ben與陳錦鴻、蘇玉華及田蕊妮等拍攝劇集《蘭花刼》，亦是他外闖重返無綫的第二套劇集，早於十年前已於海外及無綫收費電視劇集台播放，現時無綫於黃金時段播該劇，身為演員當然感到開心，Ben說：「其實大家都開心嘅，始終公司睇到呢套係好戲，攞番出嚟播。之前海外巿場嘅口碑都唔錯，十年咪十年囉！」始終拍於十年前，演員對該劇印象已不太深刻，其中田蕊妮是初到無綫的第一套劇集，但此時此刻已是「視后」級人馬，Ben說：「我同蘇玉華最多對手戲，記憶之中同佢有場教堂結婚戲，亦有場出浴戲！講起嗰場出浴戲，我哋兩個塞埋喺一個好窄嘅浴缸度，兩個隻手(月爭)都撞到瘀晒，但個樣仲要Keep住好甜蜜咁，好好笑。」
後生就係咁，想有啲轉變
提到田蕊妮曾於訪問中大談與Ben的「當年情」，原來他當年外闖期間，曾於亞視與陳煒、田蕊妮及陳法蓉等合作，還與阿田於劇集《搶槓夫妻》中飾演夫婦。說到當年為何突然離巢外闖，Ben說：「後生就係咁，想有啲轉變、嘗試，出去見吓世面。一返嚟電視城已經變咗喺將軍澳，好多嘢都好陌生，要重新適應。」現時不少演員都外闖博一博，拍攝內地劇或網劇等，Ben笑言自己猶如股票，適宜長期持有：「我有我嘅獨特性，適宜長期持有，有時間咪同老婆去吓旅行，屋企人、老婆都喺香港，唔想分開，依家平台咁多，公司又多咗好多合拍劇，要同外面人合作機會都好多。」
演員好似一隻棋，睇開啲
做娛樂圈這一行，演員往往被動，亦沒有安全感。Ben的多年老友麥長青早前於劇集《親親我好媽》中遭易角，而接替角色的就是Ben，當時感覺都不太好受，問到會否對周遭的更沒甚安全感時，Ben說：「現實係有殘酷嘅一面，呢啲場面難免會出現，畢竟發生喺好朋友身上，自己會感受多啲。不過呢一行就係咁，有時你取代人，有時人取代你，我都試過畀監製Hold住個期，跟住又放番你出嚟。有時做演員就係咁無奈，就好似一隻棋咁，睇開啲就冇咁唔開心，我個人睇得好開。」
觀眾有讚賞，仲投訴啲乜
Ben與太太結婚十二年，目前沒有小朋友，但受基督徒太太影響，2004年開始信主的他坦言每個人價值觀都不同，一切隨心，人便會開心一點：「好多嘢會正面咗！（你一生都算幾順？）又唔係話好順！好多嘢點睇，係同自己性格有關，我又唔需要大富大貴，對於依家自己擁有嘅，我都滿足，我係一個知足嘅人，有一份喜歡嘅工作，依家逐漸向上揚，觀眾亦有讚賞、對自己肯定，自己都唔知仲要Complain啲乜！工作與工作之間，我又可以同太太去享受、去吓旅行，可以話係斬件式環遊世界，係我哋工作以外嘅小目標。我都好想去肯雅睇動物，依家計劃緊，可能最後未必去得成，但籌組吓、計劃吓，兩公婆都已經好開心。」
後記：「阿海」多人識
不論是以前清水灣抑或現時的將軍澳，電視城內不少幕後工作人員行過都會大聲叫Ben做「阿海」，他都絕不介意開心Say Hi。舊一派較重情，Ben當年經常與張錦程、陳錦鴻、林家棟、鄭嘉穎與張家輝等開工，縱然各人現有各自發展，但仍有緣相聚！當日Ben在訪問中提及舊戰友，殊不知晚上便碰見錦程、錦鴻及家棟出席一廠的錄影，大夥兒趁機來敍舊一下！