楊千嬅囝囝呷余文樂醋
【陳奕龍澳門直擊】藝人楊千嬅昨日到澳門出席「第二屆澳門國際影展暨頒獎典禮」記者會，她指兒子Torres呷余文樂醋：「有次同個仔玩視像，余文樂喺後面行過，我個仔即刻走開唔玩，見我拍《春嬌救志明》被樂哥哥攬，佢又嬲咗一陣。（佢唔鍾意樂哥哥？）佢會覺得喺媽媽身邊嘅應該係佢自己。」
千嬅笑指Torres想與樂仔睇齊：「佢問佢可唔可以都有樂哥哥手臂上啲painting（紋身），我話小朋友生日party就可以畫囉。（如果個仔大個想紋身？）我會話佢知好痛。（想佢紋阿媽個名楊千嬅？）我驚佢會畀人話裙腳仔喎！（紋女友個名呢？）紋喺睇唔到嘅位就唔知喇，但我會同佢講，除非係好好、認定咗，唔係就要諗清楚，媽咪有啲失敗經驗分享。（有咩？幾時呀？）我即係話作個古仔勸佢呀！」