藝人陳嘉寶（Anjaylia）11月便與男友黃頌祈（Epaphras）拉埋天窗，出名孝順的她趁着父親節來臨，親手畫了一張卡送給父親感激養育之恩，卡上用木顏色畫了一些生果，可惜將「Father」串錯做「Farther」，真係失手！
問到如何慶祝父親節？她說：「同爸爸食牛扒慶祝，因為佢鍾意食牛。」對於親手畫卡送給爸爸，她說：「成廿年都冇畫畫畀佢，今年心血來潮咪畫張卡畀佢，過程好緊張，畫咗好多張都唔滿意，但最後揀咗呢張。」對於串錯字，她笑說：「好多朋友都有睇過，但都係主要留意邊張畫得靚啲，同我一樣都冇為意串錯字，連Daddy睇咗都笑咗一笑，話我由細到大都咁粗心，冇變過。唔緊要啦，一個美中不足，惟有請佢食飯補數，年年都咁過，孝順就日日都係父親節，Daddy都好開心。」