家強嚴父出乖仔$1都唔畀
殿堂級樂隊Beyond成員黃家強有子初長大，罕有曝光的兩名中日混血兒子天生明星相，最令家強感恩的是囝囝又乖又純，未試過激到他嘔血，全靠太太教子有方，奉行「零」用錢及24小時監察，為杜絕愛兒變「小學雞」，甘做嚴父嚴母。
52歲的黃家強和日籍太太Makiko育有兩子，10歲黃慶譽（前名黃慶陽）及5歲黃曜陽，鮮有露面的「小星二代」慶譽原來身高已達爸爸的膊頭，而弟弟曜陽的笑容最似家強，好冧女！昨日趕返內地工作的家強接受電話訪問時被問到如何慶祝父親節，他說：「都係食吓飯，兩個仔就送自己畫嘅卡囉！」
冇睇過電視劇
家強兩子就讀國際學校，談及管教兒子問題，自言小時候和亡兄黃家駒通街走如「野孩子」，當年父母給他們幾蚊落街「自己搞掂」，但覺得時代不同，管教小朋友不能依舊一套，他說：「我哋從來冇畀零用錢個仔，咁細個做乜咁快要錢，唔想佢哋咁快有錢嘅觀念，零食我哋會買畀佢，佢根本唔知有出街買零食呢樣嘢。」家強自誇由父母安排的零食不會令慶譽感「失禮」，他笑說：「佢同學仔啲零食得兩舊番茄、兩粒蘿蔔咋，我個仔有包薯片已經好好。（你個仔有冇手提電話？）冇，佢要電話嚟做乜，阿媽成日喺佢隔籬。」
家強覺得小朋友有基本生活資源就足夠，課餘時間毋須太多自由：「佢哋冇得一個人出街，家陣好多拐子佬、孌童癖，我好驚，如果要玩就叫同學仔嚟我屋企，或者老婆帶佢哋去Club House；佢哋每日只可以有半小時玩iPad同睇電視嘅兒童節目，冇睇過啲電視劇，因為我唔想佢咁快做老人精。」
30蚊玩具當寶
問到可覺得對兒子管教太嚴？家強承認多得太太嚴管，兩個仔才又乖又純，又指對兒子並非次次「Say No」，好似大仔要求買風靡全球小朋友的指尖陀螺（Fidget Spinner），初時太太不准，最後囝囝如願當30元的新玩具是寶，他說：「我玩過覺得好無聊，連細仔都買咗個10幾蚊嘅，有啲要成百幾蚊o架！（買平版畀個仔？）唓！唔係翻版係渣版。」除買玩具有商量外，兒子學習方面也會作出「讓步」，正如囝囝只懂普通話、日語及英語，但不識廣東話，他說：「廣東話發音好難，如果再逼佢，怕佢哋負荷太重搞到變啞呀！」
至於兩個囝囝可有遺傳他的音樂才華？家強稱慶譽4、5歲時在強迫下學鋼琴，當年見兒子不情願，曾跟太太說不用學，但太太堅持：「佢話唔理。（可以唔學？）係唔理佢鍾唔鍾意都要學，依家咪幾好，佢對音樂開咗竅，老師話佢吹小號好有天分，佢知音樂要有基本功，唔使逼自己都繼續練鋼琴。」
文：音樂組