雨僑 陳婉衡結盟 火辣夏水禮
雨僑與陳婉衡兩位有料之人，昨日以谷胸泳裝上陣為無綫拍節目，輕易打低同場穿保守泳裝的陳瀅與陳嘉桓。為節目擔任隊長的雨僑，笑指一眾女隊員不諳泳術，連前港男翟威廉亦得個樣，天氣冷熱都嗌救命。
雨僑、陳婉衡、陳嘉桓（Rose）、陳瀅及連詩雅等昨日齊集佛山，為無綫Amazing Summer節目《瘋狂夏水禮2017》展開一連數天的拍攝，眾女以泳裝上陣，相對於日前的T-Shirt及短褲，昨日穿泳裝總算「見真章」，當中雨僑與陳婉衡谷胸晒線最為搶鏡，輕易打低其餘女星，大隊於酒店內的33樓泳池取景，私隱度十足，而眾女星下水前亦做足安全措施。
為節目擔任隊長的雨僑，透露大隊已進入第二天拍攝，過程尚算順利：「都拍得好開心，算係第一次冇穿冇爛去，之前試過玩到跛腳，今次健健康康做隊長，同埋原來我係呢啲遊戲節目鐵腳，成日都有份。」不過面對一眾隊員，雨僑無奈說：「Rose同陳婉衡唔識游水，翟威廉又怕凍、又怕熱，又嗌眼瞓咁。」
連詩雅搽防曬變雪人
而首次拍水上遊戲節目的連詩雅，玩得相當盡興，於水中被陳瀅從後胸壓擁抱，盡現玲瓏浮凸身材，連詩雅說：「真係笑到肚痛，但我雞手鴨腳，好快畀人掟落水，成班人拍到好似大學旅行咁，唔覺得辛苦！」又指為免曬燶，拍攝前已搽大量防曬，自嘲儼如雪人般。
文：影視組