劉心悠背負外星使命 同地球人唔過電

入行多年的劉心悠極少拍性感戲，亦鮮有緋聞，可算是影壇清泉。她在新片《女人永遠是對的》有一場穿小低胸睡衣的色誘戲，但依然未有大解放晒事業線，她直言入行多年一直緊守性感底線：「規範住自己唔可以太性感，腦入面有把聲音，有啲嘢做咗會跟住你一世！依家拍《宮心計2深宮計》嘅服裝只有我覺得好低胸，個個演員都覺得好靚好正常。其實我幾尷尬，個個男人都高過我，從上咁望落嚟，我點打底都冇用，但冇辦法，惟有快啲拍快啲完！最性感一次係拍《軍雞》跳艷舞，得一個Bra，條褲短到見到Pat Pat，Oh My God，我會諗以後個孫會見到！（如果拍戲要着泳衣？）一定唔得！試過收到好感動嘅劇本，但要裸露，我都推咗。」

心悠片中角色眼角高，她笑言與真人各有難頂之處，並剖白真愛難覓的原因：「我好多怪癖，例如唔鍾意人哋幫我夾餸，覺得餸同飯係要分開；又例如返到屋企要閂晒門窗，空氣流通嘅感覺唔舒服。」

朋友嫌離地

她坦言近年有研究靈學，覺得自己是外星人，很難找到知音人與她聊這個話題：「我嘅諗法係比較另類，我相信有一日會返去天狼星，我嘅使命再大啲，想做對社會正面嘅事，唔拍拖都冇所謂。（難搵到啱傾嘅男友？）我鍾意傾科學、外太空，唔係太多男人頂得住呢啲，朋友都搞笑話要打我幾巴，想我貼地啲！」

此外，心悠與方力申首次合作，但第一場戲就是咀戲，更要心悠做主動，她直言印象難忘：「小方企喺度，我就一直錫佢塊面，錫到去嘴。（好咀？）佢唔郁好乖，任我魚肉！」

心悠一直堅守性感尺度，笑言怕將來被子孫看到露肉演出。

心悠穿密實睡衣施誘，吸睛度不及同片Deep V的張可頤及扮女僕的詩雅。

文：影視組

髮型：Eric Chow@Xenter

化妝：Circle@Annie G.Chan Make-up Centre

服裝：ZIZTAR