呂晶晶靠阿媽掃大陸樓 10年升4倍！
藝人呂晶晶近年中港兩邊走，懂得理財的她被指是圈中小富婆，晶晶自言母親是「投資顧問」，只愛買磚頭，10年前已積極買大陸樓，現升值3至4倍，讓她覺得買樓最保值，會繼續密密做密密買。
被指是圈中小富婆的呂晶晶自誇聰明，將所賺的錢全交由媽咪管理：「細個唔識理財，依家當然要多謝媽咪幫我儲錢，可以買樓。如果錢喺我手，我一定會使晒，我冇咩錢銀觀念，見到靚嘅、鍾意嘅嘢就會忍唔到手買。（你係圈中小富婆？）要多謝媽咪，佢識投資，畀意見叫我買樓，樓最保值，儲夠錢就買。（手上有幾多樓？）唔多，我有自住又有投資，咁好正常，唔係小富婆。（啲樓升咗幾多？）我10年前買，價錢較平，主力喺家鄉杭州買樓，雖然唔係一線大城市，但最少都升咗3、4倍。買磚頭最穩陣，蝕就唔好賣，等升先賣。」
即將開拍《隱世者們2》的晶晶 早前趁有空檔努力學英文：「一直覺得英文唔夠好，想有進步，搵私人老師學咗半年，因為大學畢業冇咩接觸英文。（搵外國男友？）冇咩機會接觸外國人，我圈子細，如果有都可以交個朋友。」
少出街 照顧母親
晶晶父親去年過身，本來在杭州居住的媽咪現來港與她同住。她說：「屋企得我一個女，要照顧媽咪，佢嚟咗香港，我嘅生活好大轉變。因為以前放好多心思喺自己身上，但依家想媽咪開心，顧佢多過顧我，少咗出街。（變相冇機會拍拖？）真係冇咁嘅時間。（媽咪想你快啲搵個伴？）佢以前想，但呢兩年冇再特別催，可能見到我成熟咗。」
文：名人組