泳兒發火跪地唔准爸媽嘈交

泳兒早前到台灣拍攝《一隻小豬》MV，坦言喜歡黃中平導演，因對方把她拍得最靚：「今次佢加咗極端少少嘅故事元素，譬如有個房屋經紀受唔住顧客苛刻嘅要求，就搵條水喉射佢。」泳兒有留意MV的網上評論，有人認為現實不可能發生，又覺得那個低EQ的經紀會教壞小朋友：「佢哋講得好啱，當你係成人嘅時候會有好多顧慮，就算想用水喉射人都唔會做出嚟。都係一啲反思，當你被社會逼得太緊，都要保留番純真一面。」

男友愛黑面

泳兒笑言想過像那經紀一樣對不平事反擊：「諗吓都覺得幾爽，可能有時遇到服務態度唔係咁好嘅就好想鬧佢，但又唔可以，或者體諒佢嗰日可能心情唔好，但心裏面好想表態。」她自認是理智的人，但原來中學時期的她亦曾有「激動」一面：「如果爹哋、媽咪為咗芝麻綠豆嘅嘢鬧交，我會好激動，試過掉爛晒屋企嘅嘢。有次我老竇買咗件衫，媽咪覺得好核突，兩夫妻冷戰咗3、4日。我覺得好無聊就發好大脾氣，將啲文具掉落地，仲試過激動到跪喺度叫佢哋唔好嘈交。」雖然父母被她嚇怕，但的確從此收斂不少。問到與男友的相處，泳兒形容冷靜得多：「佢比較鍾意唔講嘢，淨係黑面，但我有不滿就希望三口六面講清楚同即日解決，所以會撩佢講。」她認為對方不說話就代表明白，又或者自己等起碼30秒，對方思考完就會分享想法。

泳兒搵來黎瑞恩合唱新歌《搖籃曲》。	泳兒早前遠赴台灣拍攝的MV，在網上引起討論。	泳兒搵陳家樂一起監製新歌MV。

執導新歌MV

至於第二首派台歌《搖籃曲》，泳兒首次自薦做MV導演，請來陳家樂等一起監製：「如果交畀其他人做，我未必識表達。」泳兒由事前開會、構思故事、揀場地、服裝和演員都親力親為：「拍咗廿幾個鐘，前一晚瞓得一個鐘，完咗仲要剪片，起碼睇咗100次。」她認為當中最難割捨豐富情節，下次想挑戰做微電影導演。

文：音樂組

攝：吳文聰

化妝：木子維納Vena

髮型：Ziv Yeung（pi4.hk）