陶大宇情懷蒸排骨複製媽媽滋味
東網巨星推出全新節目《星級煮意~鍾菜．鍾廚》，廣邀圈中名人、紅星一展廚藝，示範家常小菜，隔住個Mon都聞到陣陣餸菜香！節目還邀來名廚品評及傳授烹飪小知識，娛樂與資訊並重！睇東網巨星，餐餐有餸加！
東網巨星推陳出新，今次要餵飽你哋！全新節目《星級煮意~鍾菜．鍾廚》登場，數十藝人、名人自告奮勇展廚藝，包括有線及viuTV的飲食節目主持、「煮得」之人陶大宇及杜汶澤，而跟《食平D》肥媽偷師不少的契仔陸浩明，亦帶同女友陳詩欣下廚，其他星級「煮人」還有靚女陳嘉桓、周嘉莉、葉芷如、陳意嵐、陳嘉茵、阮頌揚及網紅黃建東等，齊齊炮製撚手小菜。
自小入廚房偷師
打頭陣是有「煮食男」之稱的陶大宇，他為大家精心炮製一味富有情懷的「豉汁豆卜蒸排骨」，大宇在整個煮餸過程中流暢有序，盡顯功架，而情懷蒸排骨更令工作人員「爭住食」，個個攞定白飯等出爐，食得津津有味。
大宇累積多年經驗，煮餸煲飯都難不倒他，其入廚經驗更是從兒時開始：「應該係自小受媽媽影響，好鍾意入廚房睇佢煮餸嘅步驟，更加唔明一個女人仔點可以喺半個鐘至45分鐘煮到十個八個餸出嚟！我覺得好犀利，尤其是團年飯，兄弟姊妹返到嚟，一句話『食飯』，阿媽就起晒啲餸出嚟，令我好想入去偷師！」
跟足家傳調味配方
大宇跟陶媽媽學懂不少小菜，他說：「阿媽最鍾意蒸雞同排骨，雞蒸熟就好香，較易整，但排骨就唔同，要醃，但調味料好個人口味，我就跟足阿媽方法，由細食到大，除咗食嗰個味道，就係食嗰份情懷，食嘅時候，同阿媽相處嘅生活點滴就喺腦海中浮現出嚟！」
《星級煮意》每集均由名人、紅星親自下廚煮一道菜，睇過就會學識，節目逢星期一及星期四更新，大家記得在東網App及東網網頁收看及重溫。
廚藝Tips 醃排骨不宜太多生粉
入廚22年的「鍾菜．鍾廚」邦師傅，大讚大宇廚藝純熟及煮出住家味道，不過邦師傅指一般蒸排骨如果需要用到豆卜，會先以上湯煨，令豆卜在蒸煮過程中不會容易變乾；他還指出在醃排骨過程中不要落太多生粉，排骨便會有更多肉汁。
Step by Step
1. 用生抽、老抽、鹽及糖醃排骨，然後加入適量生粉，再加入少許胡椒粉及麻油，將所有材料撈勻。
2. 將豆卜剪開，然後平均放於碟上，白色部分向上，再將排骨放在豆卜上。
3. 鋪好排骨後，加入豆豉、薑絲及辣椒絲。
4. 蒸大約20至25分鐘即可，最後以葱花作點綴。
https://goo.gl/z7MLLw
文：影視組
攝：吳文聰
場地提供：鍾菜 九龍灣宏遠街一號「一號九龍」G01舖