姚子羚搞到分手湯洛雯上晒癮
湯洛雯在無綫新劇中誤會姚子羚做「小三」勾引黎諾懿，而現實中兩女亦施展過Check電話破邪花大法，其中姚子羚更試過「中獎」，搞到同前度分手。而黎諾懿則自爆同薛家燕有「床上動作戲」，家燕事後更爆趣笑說：「佢好吸引！」
藝人薛家燕、姚子羚、湯洛雯和黎諾懿，昨日在將軍澳拍攝無綫新劇《燦爛的外母》外景，戲中湯洛雯跟媽咪薛家燕撞破老公黎諾懿和前度姚子羚密會，但整件事純屬誤會，兩人只是相約傾生意大計。談到捉姦經驗，湯洛雯坦言沒有，但試過Check前度電話，更Check上癮：「港女十式！趁佢去洗手間就睇吓！」
擊退邪花短訊侵襲
而姚子羚試過發現前度袋住手機睡覺，之後就心思思想Check電話，最後發現「一啲嘢」，所以跟對方分手：「又試過幫前度覆Message，有個內地女士搵佢，問『親，你記得我嗎』，我覆番佢我係佢女朋友，佢就即刻話『唔好意思，打攪晒』。」令對方知難而退。
薛家燕床戰黎諾懿
至於黎諾懿自爆前日與戲中外母薛家燕拍攝「床上動作戲」，自己更以窩釘SM性感裝扮上陣：「唔識着條褲，着咗都唔知遮得邊，係幾得意嘅，起晒釘咁，但我家族（遺傳）太勁喇！」薛家燕則對「女婿」身材讚不絕口：「好吸引！」問對方有否露股演出，她笑說：「其實我唔敢點睇！」更笑指多年來未拍過「床上戲」，最後竟奉獻給黎諾懿。
文：影視組