周柏豪率師妹做狗奴一腳踢
周柏豪將歌迷聚會移師到庇護狗場舉行，更帶埋父母、連詩雅等三位師妹齊做「狗奴」照顧被遺棄狗隻。柏豪負責最辛苦的「雜務」，清潔、膳食一腳踢；連詩雅孖黎紀君變身「寵物美容師」為狗扮靚；至於梁諾妍則是「狗公關」專責冧狗，雖做到汗流浹背，但將齋飲飲食食的聚會變得更有意義！
歌手周柏豪（Pakho）為令以往和歌迷歎住冷氣、又飲又食的聚會變得更有意義，帶領歌迷、父母及三位同經理人公司的師妹連詩雅（Shiga）、模特兒黎紀君（Christy）及梁諾妍（Inez）齊當狗義工，日前一行20多人到大樹下動物善待庇護站照顧逾百隻被遺棄的狗隻。
貼心的Pakho為免歌迷辛苦，掏腰包租小巴接載，又自備大批雞柳、烚蛋及物資贈小狗及義工，還請了攝影師為狗隻影靚相。
雖然露天狗場氣溫高達攝氏32度，身穿背心露麒麟臂的Pakho熱到變「水人」，但他樂在其中，掃完狗籠又忙炮製大餐給狗狗食。
連詩雅幫手沖涼
至於Shiga及Christy卸下女神光環化身「沖涼妹」，為50多隻小狗逐一洗白白及梳毛搞到全身濕透。Inez就做「狗公關」氹狗開心，見她不怕污糟，整個人坐入狗籠餵食，狗狗由「怕醜」變到向她投懷送抱，場面極有愛。
以愛貓名義籌款
自言兌現了十年前承諾的Pakho說：「一直想同歌迷放低電話，幫助有需要幫助嘅人同動物，希望借助藝人少少嘅影響力，令更多人參與義工，今日只係一個開始。」他更以已過身的愛貓「小白」名義籌集善款。
Shiga自言享受為狗狗沖涼、梳毛及餵食：「有啲狗狗係被遺棄或被虐待過，初時有啲驚我哋，但畀啲耐心同溫暖，狗狗就慢慢放鬆畀抱同摸。」首次當狗義工的Christy說：「最難忘同一隻叫靚B嘅狗狗沖涼，我差啲整親佢耳仔，但佢都好馴，冇咬我。」Inez說：「我最開心有隻得幾個月大嘅狗，初時一見我就彈開，但我又摸又餵佢食嘢，佢竟然畀我抱。」
文：音樂組