霆鋒除拖打鼓 300人朝聖
已有十多年未在港開騷的謝霆鋒，昨日驚現港九街頭玩「快閃演出」，為師弟妹洪卓立、泳兒、鍾舒漫、羅力威及許靖韻放下「鑊鏟」做神秘嘉賓踩場，Chok爆打鼓支持，吸引近300人街頭圍觀。
張敬軒上周到尖沙咀碼頭跟街頭表演者玩Busking（街頭音樂表演），召集一班喜愛音樂的年輕人加盟「音樂大童」行列，吸引大批市民圍觀。昨日輪到泳兒、洪卓立（Ken）、鍾舒漫（Sherman）、羅力威與許靖韻接力，在銅鑼灣時代廣場玩Busking，五人事前曾拍短片邀謝霆鋒、容祖兒與林峯前來即興表演，想不到真的成功「召喚」！
五人現場先選唱霆鋒的經典歌《壞習慣》，隨即吸引不少市民圍觀，當準備唱出主題曲《音樂大童》時，突然傳來霆鋒的聲音：「搞緊咩呀你哋？」現場近百圍觀者見到霆鋒即起哄！最抵死的是創作該主題曲的Eric Kwok剛路過，霆鋒即捉埋他一齊玩！雖然「冇開金口」，但他坐在木箱當鼓打敲擊伴奏，全程「Chok到爆」，Jam一首歌後便快閃離場。
讚有意義 病病哋照嚟
霆鋒驚喜現身令現場反應極High，加上一首歌又點夠過癮，故霆鋒在昨晚的「音樂大童」第二站尖沙咀亦Encore現身，再次令全場起哄，吸引近三百人來「朝鋒」，霆鋒說：「唔好意思我病病哋，事前都唔知咩係『音樂大童』，下晝玩咗一轉就知道係咩，了解咗覺得好有意義！佢哋叫我不如夜晚再嚟，所以咪嚟囉！今日玩咗一首歌係短咗啲，Anyway覺得係幾有意義，音樂係無分疆界國籍。」其後，霆鋒在現場認真準備音響，當Ken自我介紹時，他打斷說：「香港好耐冇呢啲咁健康可以聚集一齊嘅活動，尤其係音樂……」在旁的羅力威竟大膽說：「霆鋒哥哥，可唔可以畀我哋講埋先。」連工作人員都忍不住爆笑。
泳兒嚇親 差啲跌埋咪
霆鋒繼續Chok爆坐木箱敲擊伴奏，但可能「入早咗」，Sherman笑說：「霆鋒哥哥，可唔可以慢少少。」期間，霆鋒除下拖鞋忘形地拍打伴奏，逗留短短十分鐘快閃離場，臨離開前感謝現場人士熱情圍觀：「希望將『音樂大童』嘅精神傳落去。」
對於「大師兄」驚喜踩場，泳兒、Ken與Sherman坦言勁開心，從未想過能與霆鋒玩Busking，泳兒說：「估唔到一生第一次Busking可以召喚『大師兄』霆鋒嚟，差啲嚇到咪都跌埋！」Sherman亦指今次是個很大驚喜及回憶，與Ken同樣希望霆鋒快點開騷，讓他們重溫其經典歌曲。
文：音樂組