陳凱琳預告兩年內嫁嘉穎
藝人鄭嘉穎與陳凱琳（Grace）雖然相差22歲，但無阻父女戀發展，二人撻着兩年，感情穩定。昨日Grace為婚紗騷擔任模特兒，自爆計劃兩年內拉埋天窗，更憧憬陽光與海灘的婚禮！
昨日陳凱琳為「第87屆香港結婚節暨夏日婚紗展」擔任模特兒，示範四套婚紗，打頭陣出場的她，背景音樂突然停頓，但她經驗豐富、處變不驚，期間不慎絆到裙腳差點仆倒，仍表現淡定，完騷後更向觀眾拋花球，十足新娘！
着起婚紗So Sweet
對於發生蝦碌事？她說：「做慣大騷、live騷，我做大騷都會有好多蝦碌嘢，今次都唔係最worst嗰次，但都係難忘嘅經歷。（頭先差啲絆倒？）係呀！因為我轉唔切身，裙襬有個鋼紗，好在好快冇事。」
她又表示前日試身時有幻想將來出嫁的婚紗款式：「可能會揀長袖婚紗，因為將來睇番都夠classic！」她透露今次是第二次行婚紗騷，亦是拍拖後首次，問到會否特別sweet？她即甜笑說：「都會！頭先有一刻行得好投入，都會諗面前如果係邊一個心情會點？頭先同個化妝師傾開，佢話啱啱幫對新人喺峇里婚禮化妝，我聽到都覺得幾好，又夠私人，可以親近大自然，又同班朋友可以close啲，大家唔着鞋踢沙幾正！」至於婚期？她坦言會是兩年內：「都會係呢兩年嘅事，佢唔想我乜都未經歷過，好似一個人獨立嘅生活咁，因為結咗婚就唔係一個人，係兩個人一齊生活。（你未準備好？）要多少少時間。」
文：名人組