奪范文雅第一次！ 袁偉豪大整蠱食完蒜蓉Kiss
型男袁偉豪前晚在沙灘拍攝被小花范文雅主動示愛兼獻吻的戲份，但他未有憐香惜玉，事前竟孖住唐詩詠食蒜蓉包，令師妹這個螢幕初吻相當重口味！現時冇女一身輕的他，笑指即使有另一半，拍親熱戲也沒有包袱。
袁偉豪（Ben）、范文雅與唐詩詠前晚在石澳海灘為無綫新劇《棟仁的時光》開工，拍攝范文雅主動向Ben示愛並獻上蜻蜓點水一吻的戲份，劇中她獻吻後突然暈低，要救護員唐詩詠急救。身穿短裙騷長腿的范文雅，拍攝時挨身挨勢，加上嗲聲嗲氣，即時令Ben投晒降，最終NG兩次才完成。
鍾意女朋友撒嬌
Ben在劇中與唐詩詠及朱晨麗等靚女都有對手戲，今次更獲范文雅主動出擊，艷福無邊！他坦言現實中未遇過主動女生，並笑說：「真係無福消受！（所以拍戲享受？）可以咁講。（拍Kiss戲前有冇準備？）冇！仲食蒜蓉包，亦冇漱口，法式濕吻先要準備啫！（接受女生咁嗲？）都好，會冇咁悶，適量都OK！」問到是否單身才沒有包袱？他說：「拍拖時都冇，最緊要係同對手溝通得好，令對方舒服冇尷尬。（唐詩詠話下次同你拍Kiss戲時，會講明有咩唔食得。）吓？我唔會理，唔係一定要男仔遷就女仔，可能我食榴槤呢！都要睇睇錫嘅程度，如果法式濕吻就要搞搞衞生！」
范文雅食香口膠
至於獻出螢幕初吻的范文雅，拍攝時有點驚青及生硬，她透露埋位前有食香口膠，問到是否很緊張？她說：「我有瞇眼，好彩袁偉豪有指導我！現實嘅我係不懂撒嬌的女人，心入面住咗個男人，加上依家冇男友畀我嗲。」
而日前才與Ben拍攝人工呼吸戲的唐詩詠，今次改為與范文雅嘴對嘴，拍攝前還與Ben齊齊食蒜蓉包，她說：「頭先一齊食飯見佢食，我仲問佢乜唔係一陣拍咀戲咩？」
文：影視組