軒仔街頭賣唱女粉絲興奮攬攬

歌手張敬軒昨晚在尖沙咀海旁驚喜快閃20分鐘，大玩近年熱爆的busking（街頭獻唱）！身穿牛仔褸的他一出現已被眼利粉絲發現，追住跟他合照，之後軒仔駐足聽現場的busking，聽了三首後更直情唱埋一份，他一開口大家即拍爛手掌，並吸引愈來愈多人圍觀，包括外國人和小朋友等，最高峰時有近300名粉絲及途人支持，場面墟冚！

遇「天星碼頭Eason」

圍觀者不斷歡呼及大叫「軒仔」，軒仔一開始唱出《音樂大同》，唱完後他大讚該busking歌手厲害，更幫對方改名做「天星碼頭Eason」，他亦謂：「無論我哋嚟自邊個地區、邊個年齡、邊個國家、邊種職業，到呢一刻我哋有音樂嘅時候就可以喺同一個空間相遇，感受彼此嘅情緒。好開心識到呢班咁好嘅朋友仔，對音樂好有熱誠！」

之後他就唱出《青春常駐》，唱完後他說：「我應該記得嘅，雖然我成日唔記得歌詞，不如我哋同場加映多首《櫻花樹下》好嗎？」大家即刻歡呼！

首次玩busking的軒仔獲近300粉絲及途人支持。

離開時軒仔獲女歌迷突圍攬攬。

約英皇歌手一齊玩

唱完三首歌後軒仔笑言：「人生第一次busking，現場朋友畀啲支持嘅掌聲我哋。」事後他說：「好緊張呀，第一次玩busking，但原來好開心嘅，如果可以組到隊就好，集埋英皇其他artist玩多次！」之後便匆匆結束20分鐘的快閃之行，離開時獲眾多歌迷跟住，期間更有女歌迷突圍攬住軒仔，令其他粉絲十分眼紅！

文：音樂組