譚凱倫獻螢幕初吻報答知遇恩

ViuTV選美真人騷《美選D.n.A》3位落選佳麗：譚凱倫（Helen）、趙詠瑤（Kimi）及梁婉微（Milky），獲ViuTV睇中簽約做藝人，並分別獲派新工作，圓了藉參選入行的心願。Helen說：「公司安排我參與兩個節目，其中一個同Milky去體會打工生涯，去咗整臘腸同搬屋。臘腸工場入面連啲空氣都瀰漫住油脂，拍完成身油。我更會在另一個節目獻出螢幕初吻！（瞓身報答電視台知遇之恩？）其實我入行想試新嘢，乜都想試，所以參加《美選D.n.A》，雖然參選嗰陣被網民負評我棚牙勁樣衰，但我睇得好開，唔會介意，因為我都想儲錢箍牙。」

Milky轉型做打女

而自認「老屎忽」的Milky就表示：「雖然我做咗多年model，但未做過電視，去食品工場拍嘢，雖然成頭油，但幾好玩。另外，搬重嘢都難唔到我，雖然搬雪櫃、洗衣機有啲難度，拍完肌肉勞損，但我係自己一個住，平時都係自己照顧自己，冇人幫，我覺得做得呢行就係發生乜事都記住要娛樂大家！我想多啲人識我，長遠想向打女方面發展，我知Kimi都想做打女，好想同佢過兩招！」

梁婉微model出身，擺Pose晒腿冇難度。	已為人妻的趙詠瑤最想拍戲做打女。	想拍劇的三女，先從綜藝節目開始做起。

人妻Kimi唔再發夢

Kimi身為人妻，但簽約電視台絕非賺錢買花戴，她說：「我以前發明星夢，依家簽咗約有明確努力目標，老公都好支持！公司安排我同之前真人騷《脫獨工程》嘅Suzuki，去新西蘭拍旅遊節目，但我唔想聽佢唱歌呀！我想藉電視入行，除咗做旅遊節目，都想拍戲做打女！」

文：影視組

攝：劉智源

髮型：Nelson張耀之（Kimi）、Franco@Hair Corner（Milky）

場地：Comic Park & Cafe