BabyJohn殺入電視圈望翻咀欣宜
蔡瀚億（BabyJohn）近年不斷嘗試新角色，早前更由影圈跳入電視圈，拍攝無綫新劇，令他學懂如何24小時Keep住入戲狀態！新劇有三位女對手岑麗香、鄭欣宜與林欣彤，當然各有各好，但若果要找咀戲的對手，BabyJohn二話不說揀欣宜，因勝在夠熟落！
BabyJohn入行四年喜歡嘗試新挑戰，由初出道拍新導演、贏了金像獎最佳新演員後，做過「金鴨」、殭屍獵人，早前更於電影中演忠直、有使命感的警察，亮眼度十足，證明用心演戲永遠勝過拿着劇本爭戲份。
近期BabyJohn更由影圈跳入電視圈，參演無綫電視劇《老表，畢業喇！》。於戲中演二世祖的他，雖與王祖藍只有一場對手戲，但依然火花十足，令BabyJohn感到難忘，他謂：「呢場戲我哋要鬥講一啲番書仔嘅說話，仲要係唔同國家，出嚟嘅效果非常之好笑，拍之前我亦花咗唔少工夫，播嘅時候大家真係要留意。」
Shopping「去疲」
無綫拍劇時間出名長，幸BabyJohn很快便學懂「去疲」大法，迅速適應，他謂：「拍劇好多時廿幾個鐘，抖一、兩個鐘又要再拍廿幾個鐘，真係得好少時間喺停車場瞓一瞓，要24小時keep住拍戲嘅狀態，係好難嘅事，但你見人人做到，自己都要做。我亦留意到唔少演員喺嗰兩個鐘頭時間，都唔係休息而去Shopping，原來咁都係維持狀態嘅好方法。」
讚林欣彤似天使
戲中BabyJohn與岑麗香、鄭欣宜及林欣彤有對手戲，對於三位對手，BabyJohn讚賞不已，更以天使來形容林欣彤，他謂：「記得有日拍戲凍得好厲害，我同羅天宇四個演員震騰騰時，林欣彤買咗四杯熱咖啡畀我哋，當時覺得佢好似天使一樣，啱晒timing。」問到BabyJohn若有咀戲，最想同邊個拍？他二話不說選了欣宜：「一定揀欣宜，因為之前拍電影同佢拍過（咀戲），大家有咗信任。」
文：影視組
場地：CHIC