朱智賢晒腿搵銀3年內做包租婆
新咪神朱智賢日前以健康性感造型拍廣告，大騷32C上圍及長腿。她坦言現時工作及收入增加，希望可以三年內成功儲錢買樓做業主，但透露想先買樓用作放租，賺更多錢時再買樓自住答謝家人！
無綫新咪神朱智賢（Ashley）日前為中原電器拍攝新一輯廣告，分別以boxing、行山及潛水三個造型示人，其中一套是bra top配短褲，大騷事業線、纖腰及長腿。首次拍硬照廣告的Ashley透露事前特地keep fit：「拍攝前兩個星期即刻跑步同戒食甜嘢，食得清淡啲，戒得好辛苦，但都覺得值嘅。」她亦說這種性感程度很OK：「係健康性感，覺得呢個路線都幾適合我。（性感底線去到邊？）最盡係三點式。」講到今次廣告酬勞，Ashley笑言很滿意：「接近6位數，多謝客戶揀咗我。」
放租供樓輕鬆啲
講到於無綫節目《3日2夜》穿三點式而人氣急升，問到現時收入是否豬籠入水？Ashley笑言：「比起之前係好咗好多，我個人好易滿足，依家咁已經好開心，當然愈多愈好。」她坦言想儲多些錢買樓，但希望先買樓用作放租：「冇話特定要買幾大，因為想買嚟放租，所以主要睇吓抵唔抵買、容唔容易租出去，會儲到夠先敢買。（想幾時買到？）希望三年內買到，我要求唔高，唔一定要新樓，四正就OK，但依家儲得唔多，因為事業啱啱起步。」她透露希望買大約五百萬的樓放租，遲些賺更多錢再買樓與家人住：「因為租出去供樓冇咁辛苦，如果我真係搵到好多錢，當然都想買樓答謝家人。」
同謝東閔多話題
感情方面，講到與無綫藝人謝東閔屢傳拍拖，Ashley甜笑否認兩人發展中：「我哋係好好朋友，咁啱大家鍾意狗，多咗話題傾吓動物。（有發展機會？）世界上好多嘢都有可能，我唔會所有嘢都話冇可能，今日唔知聽日事，但暫時都係工作為主。」問到如果對方追她可會接受？她笑言：「佢追我先算啦。（佢追你就受？）唔係o架，要考慮o架，阿爸阿媽成日叫我唔好咁心急，慢慢揀。」現年30歲的她亦未急於結婚。
文：音樂組
攝：黎志輝