陳柏宇7月婚前造人啤件白羊B
陳柏宇與拍拖多年的女友符曉薇前日正式入紙註冊結婚，恨生白羊座BB的她透露已計定時辰，打算婚前開始不設防造人！另一藝人李雨陽亦在本月10號入紙，與僅相識約五個月、年輕11年的圈外女友閃婚。
現年33歲的歌手陳柏宇（Jason）與31歲模特兒女友符曉薇（Leanne）將於7月2日拍拖紀念日拉埋天窗，並在九展筵開38席，忙於籌備婚禮的兩人原來前日已遞交擬結婚通知書！通知書上，陳柏宇用番原名「陳廣偉」，女友Leanne報稱是文員，地址一欄則報稱同住堅尼地城一單位。Leanne昨日接受電話訪問時透露，已找來組合少女標本的許雅婷做姊妹，婚禮支出暫時花費約百萬。問到是否要Jason努力搵錢？她笑說：「係要一齊努力，唔係獨力承擔。」現投身金融界的她又承認曾投資損手六位數而遭Jason投訴，現時收入比做模特兒時穩定：「舊時收入萬幾蚊，依家都有六位數。」提到婚後度蜜月，Leanne表示想去夏威夷，但仍未買機票，皆因想於下個月開始造人：「想6月就造人，我好計星座，想生個白羊座BB。」
愛的宣言收埋講
Jason透過電話回覆指邀請了同年出道的歌手出席婚宴：「好似小肥、江若琳等，本身我叫佢哋下晝嚟，但佢哋堅持夜晚嚟，喺佢哋強迫下就開咗圍畀佢哋！（婚宴上準備咩驚喜演出？）有表演都唔會係我嘅，我哋都仲諗緊會唔會有啲娛樂嘅嘢。（講愛的宣言？）冇特登準備喎！我想得我同佢嘅時候先講。」又笑言有機會淚灑當場：「希望唔會，我一喊佢就笑我！」
認識五個月閃婚
另外，拍攝無綫青春劇《當四葉草碰上劍尖時》而入行的38歲藝人李雨陽，被發現本月10日入紙申請結婚，迎娶年輕11歲的圈外女友鄭嘉詠。他受訪時透露將會在6月25日結婚，直認今次是「閃婚」：「年頭喺朋友聚會認識，當晚大家都有好感，之後相處咗一段時間，最後大家有咗共識就互相見家長。（奉子成婚？）未知呀！可能隨時中咗都未知！」更笑言會將子女一歲時的樣子紋在膊頭上。
文：音樂組