文恩澄爆欠債40萬捱麵包鬱到病
由歌手轉型做導演的文恩澄不但試過零收入的坎坷歲月，還曾欠債高達40萬兼患過兩年抑鬱，幸好因緣際會下自學拍片，隨後轉型做廣告、MV導演，兩年間不但還清舊債，亦走出心理陰霾。
歌手身份出道的文恩澄（Rannes）不但與有「宇宙G.E.M.」之稱的鄧紫棋撞樣，兩人亦同是2008年出道的新人，但Rannes不但沒有紅遍大中華，更欠下一身債，因而患上抑鬱，她說：「坦白講，我做藝人嗰陣真係零收入，但都要錢生活，又要租樓又要置裝，結果要問公司同銀行借，高峰期合共欠落40萬債！嗰時除咗要捱麵包，我又唔敢出街，一冇嘢做就喊，感覺好無助，搞到有兩年抑鬱！」
無助的Rannes坦言試過上網及打電話到電台找人傾偈，睇過心理輔導指她太執着：「後尾自知要振作，但唔知可以做乜。好彩機緣下研究拍片放上網，後尾有人搵我做Job，邊做邊儲經驗，前兩年起有大公司搵我合作，可以還清晒啲債，仲支持到唔錯嘅生活，好似早排返美國探阿媽，又可以去日本、台灣旅行。雖然唔係話搵到好多錢，但開心搵到自己興趣！」
「點解佢咁紅我唔得！」
Rannes與不少出道初期要問公司借錢的新人一樣，不同的是她與「宇宙G.E.M.」鄧紫棋撞樣，坦言曾「葡萄」過對方，她說：「佢同我同年出道，話冇葡萄佢就假嘅！點解佢咁紅，我唔得！但呢種心態只維持好短時間。現實啲睇佢真係唱得好，得意又靚女，有好公司同經理人幫佢。佢13歲嗰陣，我哋已經參加歌唱比賽識，佢當年冇咁勁，我入到Final但佢冇，不過佢進步好快，所以冇得比、冇得羨慕。（想喺導演工作上吐氣揚眉？）我係有做長片導演嘅目標，但仲要慢慢學，希望先拍喜劇摸熟咗，再拍人性黑暗面嘅題材，完成自己嘅導演夢！」
文：陳奕龍
攝：劉斌
場地：Mass 2
髮型：Patrick Chan @ HH Hair
服裝：BLIND BY JW