林文龍爆宣萱酬勞高
實力派女星宣萱與林文龍憑無綫劇人氣再升，昨晚孖住現身慶功宴，對於該劇有意添食，一臉風騷的文龍不斷揶揄宣萱，先指沒有宣萱不會成事，又寸對方片酬高令無綫爪爆頭，還自嘲當老闆請對方演出便要破幾次產，認真抵死！
無綫劇集《不懂撒嬌的女人》播出以來甚受歡迎，近日結局篇劇情更緊湊，本周日（28日）會一連播出兩集大結局。而該劇暫時最高收視為28.1，跨平台總收視為30點，累計視頻瀏覽量逼近750萬次，成績相當不錯，一班演員林文龍、宣萱、王浩信及高海寧等昨晚齊集舉行慶功宴。
「佢都去荷里活啦！」
劇中演「Mall姐」入型入格的宣萱，對於監製有意開拍《不》系列，問她可會接拍？她坦言要睇劇本才決定，認為每逢續集均有危機！不過文龍卻揶揄拍檔說：「宣萱唔拍又點會有續集。（佢唔拍你唔拍？）佢搞到無綫爪爆頭，要搞掂佢啲費用先，佢做埋呢次訪問後都去荷里活啦！（你都係老闆，會唔會開拍電影版？）可以諗吓！（搵宣萱幫手？）搵佢嘅話，我公司破幾次產啦！」宣萱聞言無力招架，只好「吊眼」畀反應。
談到網民大讚文龍留鬚造型，文龍戲言說：「反應好？我今晚返去就剃，連頭髮都剃埋！（有冇信心破30點收視？）唔好自欺欺人，除非計埋myTV SUPER瀏覽啦！」
何雁詩返港蒲頭
「Saving」王浩信對於前晚在劇中以《創世紀》許文彪上身大講經典對白，他表示拍攝時拍了三Take已用盡氣力：「多謝編劇咁精心設計向以前套經典劇致敬，呢個咁有共鳴嘅對白，到今時今日大家聽到仲覺得好爽，係最開心，同埋之前我的確有參考過陳錦鴻演嘅許文彪係點。」而有份唱該劇主題曲的何雁詩，由唱片公司老闆何哲圖陪同現身，否認怕面對記者沒信心，她透露剛與家人外遊返港，對於男友鄭俊弘指外地親戚對其新戀情有意見，何雁詩表示不知情，但揚言望往後能一起面對難題。