荷里活夢工場驚喜重重，近年有阿爾及利亞舞蹈員Sofia Boutella由MV一躍而上大銀幕，變身「湯女郎」及《盜墓迷城》系列電影首個女「木乃伊」外，更與奧斯卡影后查理絲花朗拍特務片，堅瞓棺木兼挑戰埋火辣SheShe咀戲，中女瞓身上位！
35歲的Sofia近年於影壇嶄露頭角，雖然算是大銀幕新丁，不過目標清晰，短短幾年跳到近女一位置！早於5歲開始習舞的她曾為天后麥當娜（Madonna）作舞蹈員及為已故天王米高積遜（Michael Jackson）拍《Hollywood Tonight》MV，加上一個晒盡「舞功」的運動服廣告，火速上位，不過幾年前她立心轉型，更勇到盡毅然放棄一切：「我停止跳舞就係希望於演戲上投入一切。」
由細角色做起，Sofia前年終憑《皇家特工：間諜密令》（Kingsman：The Secret Service）的「刀片女」殺手角色爆紅，今年更有兩部大製作出爐，證明中女轉型仍可夢想成真！Sofia有份孖巨星湯告魯斯（Tom Cruise）演出重拍版《盜墓迷城》（The Mummy），飾演變成木乃伊的古埃及公主，更有裸盡鏡頭，不過不甘做花瓶的她並非為露而露，明言角色大有挑戰性：「呢個係首個女木乃伊，唔可以只係行行企企四圍嚇人，要帶出重要嘅事，探索佢嘅心理，要諗佢作為一個女人，點樣因為重男輕女而被騙被輕視。」至於平日跳舞跳跳紮的她為演木乃伊而要瞓木棺，自爆感覺有幽閉恐懼症：「自己郁唔到，成身被包實嘅我出入都要有人抬，從未試過感覺咁真實、咁得人驚！」堅係拍到自己都驚，為上位堅搏盡！
而出名撐女權的Sofia撐自己身體自己作主，近期與查理絲花朗（Charlize Theron）合演《Atomic Blonde》，更於片中大解放上演SheShe咀戲，場面養眼。Sofia公開讚查理絲好咀外，又稱演出法國特務被人睇到自己另一面，感覺興奮，對演戲勁有熱情！
雖然年過30離開「Comfort Zone」奮力博上位，但Sofia未有忘情棄愛變「Dry爆」，去年傳出撻着科幻電影《星空奇遇記：超域時空》（Star Trek Beyond）的型男主角基斯派恩（Chris Pine），於片中演外星人的她與基斯有不少對手戲，戲外拍住上巡迴宣傳，密密見擦出火花，更被拍到受訪期間不時冧笑，又當眾似小情侶玩手指，基斯亦曾情不自禁當眾錫Sofia額頭，雖然二人未有公開認愛，但電影落幕戀情仍未落幕，上月又被爆於Coachella音樂節派對拖手狂歡，戀火愈燒愈烈！
文：外娛組