林敏驄搵千嬅「補習」撐作品展
入行36年的鬼才詞王林敏驄終於等到6月在紅館舉行作品展，為免「做又36唔做又36」，報細數慶祝「35周年」！因作品橫跨三代歌手，阿驄呼籲楊千嬅來紅館上「補習堂」，本想找陳奕迅台上「瘋中轉」但屢次聯絡不上。
將於6月9及10日在紅館舉行《35年時日如飛林敏驄腦交戰作品展演唱會》的林敏驄，堅稱準備工夫毫無壓力：「手板眼見工夫！因為全部都唔係我對手，全部都係有手有腳嘅大歌星，上到台唔會衰畀你睇，所以唔使憂！其實我好珍惜呢次機會，因咁多歌手一齊嚟唱。」兩場合共逾20多位嘉賓歌手，陣容鼎盛足夠分拆開Part II，阿驄笑說：「你知紅館好難Book，35周年其實係上年但攞唔到期。（點解唔用36周年？）費事『做又36唔做又36』啦！」單是編排Rundown，阿驄說齋唱不說話都會超時：「成50首歌！盡量平衡啦，攞條平衡木出嚟囉！」
齊集三代歌手演繹
作品展齊集三代歌手重新演繹金曲，阿驄自誇證明作品無時間限制：「依家又Hit番《當我想起你》，嗰隻余春嬌（楊千嬅）又喺度唱。（覺得千嬅唱成點？）咁佢梗係冇咁原汁原味喇！我話咗佢啦，所以要佢嚟學一學，6月9號請移玉步過嚟。（乘機呼籲嚟做嘉賓？）呼籲一下啦！請過嚟補習一堂，上個補習班。」
講到陳奕迅（Eason）的《葉問風中轉》是阿驄近年最啜核之作，今次作品展竟沒有預對方？阿驄抵死說：「阿臣？搵佢唔到喎！冇覆機喎！好大支嘢！搵阿徐都搵佢唔到！可能好多商演，你知內地有咁多節目，就算我半年前搵佢都冇用，佢點會知期點！將心比己我都係咁，半年前搵我都答你唔到。（唔嬲佢？）點會吖！明白嘛，根本呢次當係開Party，好似啲小朋友咁，聽日喺老麥開生日會，邊個冇課外活動咪嚟囉！」
拒開金口唱多錯多
當年阿驄為梅艷芳、張國榮與陳百強寫下多首炙手可熱之作，如《夢伴》、《無心睡眠》及《深愛着你》等，問他可會親自演繹？鮮有認低威的他說：「梗係唔會啦！咁難唱，搵我自己嚟搞咩！邊個唱？到時你咪知。（你唔開金口咩？）唔使啦，煇哥（顧嘉煇）開騷有冇唱吖！我怕我唱多錯多，自己寫都唔記得歌詞係No Excuse。」
文：音樂組
攝：秦健輝
場地：Alzine Spanish Asador
髮型：Casei Wu@Beijing Hair Culture
化妝：Hailey L@Memorable Studio