陳錦鴻等甩身倒數返無綫
明年初正式約滿港視的陳錦鴻，以外援身份協助「娘家」無綫宣傳10年前拍攝的劇集《蘭花刼》，與田蕊妮等拍檔獲讚凍齡。錦鴻希望尊重合約精神，即使獲得批准亦不會「偷步」回無綫拍劇，但談到約滿後重返「娘家」的可能性，他笑說：「都想o架！」
陳錦鴻年前離開無綫與港視簽約4年，結果恍如「人間蒸發」，對上一次有劇集推出，已是2013年的《初五啟市錄》。無綫早前宣布月底推出他於10年前主演的《蘭》劇，不少網民笑言：「終於等到陳錦鴻有劇出喇！」雖然與港視的合約到明年2月才屆滿，但錦鴻昨日「重返娘家」，與拍檔田蕊妮、陳自瑤及姚瑩瑩等出席宣傳活動，並即場拍照對比10年間的分別，獲讚凍齡！
明年重新出發
錦鴻偕阿田齊齊受訪，他坦言起初得知《蘭》劇推出時大感愕然：「以為冇得出街喇！作為演員梗係想多啲人睇到自己嘅作品。（想返無綫拍劇？）咁要有人搵先得，但都想o架！演員好被動，我呢個年紀可以試演成熟少少嘅角色。（簽咗港視好似浪費時間咁？）演員工作包括等待，有錢收嘅，唔可以咁講。（幫無綫事前要通知公司？）又唔使，只係拍劇、長時間嘅工作先要講。（擔心約滿失業？趁機提前終止合約？）擔心o架！但我有始有終，唔會提出要求。」據悉，港視方面其實沒有阻止他再為無綫拍劇，無綫方面亦有打探他何時約滿，但錦鴻堅持尊重合約精神，一切待明年2月再作打算。
撩阿田傾偈定驚
至於田蕊妮表示當年與錦鴻合作愉快：「記憶中當時新加入無綫唔識人，佢就成日同我講嘢，令我個心定晒。我當然希望再同佢合作啦，好想原班人馬再拍一部監獄戲，2月好快就到（指錦鴻約滿）！」而陳自瑤被問到老公王浩信有意為她買樓，她笑說：「我都係睇報紙先知咋！買唔買到唔緊要，最緊要佢有呢個心。」並感慨《蘭》劇人事都「面目全非」：「好似魯芬姐都唔喺度，令人好懷緬。」
文：影視組