袁偉豪冇女一身輕換200萬戰車

袁偉豪與岑杏賢拍拖三年多期間，女友相當旺他，惟去年底突然宣布分手，雖然男方一直放聲氣希望復合，但女方態度堅決，翻撻無望之下，袁偉豪頓變宅男，經常獨來獨往，工作完即匆匆回家，只間中應邀出席全男班悶爆飯局。經過約半年的冷靜期，袁偉豪終於走出失戀陰霾，近來重拾以前的愛好，頻頻出動相約愛車之人兜風睇靚車。

豹哥定欣陪慶生日

事實上，袁偉豪近年劇接劇，人氣不停攀升，頻頻操肌身形甚弗的他，更成為廣告商新寵，豬籠入水之際，卻苦無另一半分享，於是他豪使一鋪氹自己開心，大手筆購入價值200萬保時捷戰車給自己作為生日禮物，等到「二奶」入宮，終可填補失去「大婆」的空虛，袁偉豪亦開始露出歡顏，早前生日更獲「豹哥」單立文、「豹嫂」胡蓓蔚、胡定欣及陳山聰等慶祝。壽星仔坐正中間，笑得相當開懷。

舊愛認仲有聯絡

自從「換畫」購下心頭好後，袁偉豪一有空便揸靚車出巡，日前下午1時許，穿上粉紅上衣襯白褲、白鞋，戴上型仔黑超的他，一身帥爆白馬王子Look離開寓所，只見他心情輕鬆地步入停車場，取回洗到靚一靚的座駕，隨即駕着新車往附近屋邨停車場。袁偉豪將座駕停泊好後，一臉風騷地行去電梯口，警覺性甚高的他，眼觀四方，火速發現記者蹤影，於是故意於商場來回行了幾個圈，期間頻頻講電話，然後一個華麗轉身，鬼祟地折返停車場，極速取車後，即用盡戰車的馬力，火速撇甩追訪。

對於前男友換車，岑杏賢表示不知情，但說：「我哋有聯絡，互相問候，我唔係車迷，但如果有關車問題都會問佢。」

文、攝：追蹤組