區瑞強同阿倫冇得比佢要我教唱民歌
歌手區瑞強（Albert）即將舉行40周年演唱會，一如以往邀請譚詠麟（阿倫）、曾志偉及陳百祥等好友擔任嘉賓，這次更請來玉女掌門人周慧敏（Vivian），Albert自爆第一眼就覺得她很可愛，還大講對方如何由小妹妹變成靚聲傳奇。Albert又坦言很欣賞阿倫受人擁戴，但與對方相比時，笑言：「佢彈結他唔夠我叻，唱民歌就要我教！」
Albert將於6月1至4日假伊利沙伯體育館舉行《感謝你！40周年演唱會2017》，他表示很難得Vivian遷就到時間參與，因她經常出埠演出，有時又很深閨，不是經常做嘉賓。說到對方當年加入電台成為其小師妹，Albert自爆第一眼就覺得她很可愛：「個個男仔都睩大對眼話『嘩，好靚』，佢到依家都仲咁青春玉女，我寫個服字，真係冇得頂。」又讚Vivian對音樂充滿熱誠，不但一直出新歌，更會寄唱片給他，現在變成中國人圈子無人不識的明星。
做電台邊玩邊學
入行40年來，Albert見證不少師弟妹成長，覺得非常開心：「記得當年有樣嘢，Vivian以前係攣毛，點解依家啲頭髮咁靚咁直嘅？以前都靚，不過好唔同Style，依家真係可以賣洗頭水廣告，襯番佢。」至於當時的電台生活，Albert形容非常溫馨，大家一起玩、邊做邊學：「同一個電台，如果有咩疑問，有咩碟要借，或者聽到其他人做節目，都會潛移默化，慢慢吸收。電台好多自由發揮嘅地方，好處係當中會形成個人風格，所以有今日嘅周慧敏同鄭子誠，呢啲靚聲能夠發揮到淋漓盡致，就變咗個傳奇。」Albert認為大家各有各發展，無分彼此或高低，共同成長。
不求人生勝利組
說到早年送了兩名囝囝到外國讀書，Albert認為是自己的願望和責任，不僅要撫養兒子成人，更要盡力提供學習機會：「佢哋依家喺人生上面只係起步，讀完大學剛剛踏入社會，喺我角度梗係唔係幼稚園鬥快、入名校嗰啲，唔使嘅。」他覺得人生不一定要追求第一，而是爭取更多選擇，因此從小到大都比較豁達：「你叫我做第九都得，我冇所謂，只要我自己Enjoy。我同譚詠麟幾十年朋友，佢賺到錢、有知名度、靚仔，我冇得比，但係咪一定要比呢？我都有佢冇嘅嘢，應該感恩我係區瑞強，佢係譚詠麟，我好欣賞佢，好開心呢個朋友可以咁成功，咁多人擁戴，但佢彈結他唔夠我叻，唱民歌就要我教。」
文：音樂組
攝：劉智源