延續愛的傳奇陳細潔落區派飯
有「鯊魚女」之稱的陳細潔，自小由嫲嫲湊大，極有愛心的嫲嫲連身邊的陌生人都會關心，上一代的身教令她和家姐劉陳小寶耳濡目染，故從小已特別錫長者，姊妹更先後加入慈善機構，延續愛、製造愛的傳奇。
今年是陳細潔（Abbie）進入保良局董事局第十一年，接棒成為第139任主席，家姐劉陳小寶亦曾為第129任主席，兩姊妹先後成為慈善機構董事局主席，延續愛的傳奇。早前Abbie率兩名90後男生Kyle和Daniel，一同到位於藍田的劉陳小寶長者地區中心探訪，為到社區飯堂用膳的長者服務。三人落手落腳裝飯及分餸，完成工作後，Abbie索性擔櫈仔邊開餐邊與長者們傾閒偈，細心的她不時提醒婆婆們小心魚骨。
問家姐借錢買嘢
Abbie透露從嫲嫲身上學會分享：「我係嫲嫲湊大，所以好錫老人家，嫲嫲行街見到乞丐會捐錢，買餸又會拎起啲送畀啲婆婆，細嗰時見佢做乜，我哋又跟住做，喺嫲嫲身上學識分享。」她笑說：「不過都係家姐分享畀我多啲，佢錫我嘛！乜都畀晒我，家姐鍾意儲錢，我就好鍾意使錢，佢唔鍾意購物，我就成日問佢借錢買嘢，有錢喺手就買晒嘢，年尾收到利是錢佢就一次過追番我還錢，哈哈！」Abbie表示當年也是家姐邀請她入局幫手：「當時我答應家姐做一年（總理）咋，點知入到去之後感覺好唔同，捐錢做慈善同親力親為去做，原來好大分別！呢幾年自己最大改變係買少咗衫，唔物質，因為發覺原來啲錢好有用，捐出去好多人會受惠。」她說身邊有位朋友，一向好孤寒，但入局後做慈善變得好闊綽，感覺慈善工作確實影響不少人。
被受惠長者感動
正所謂生命影響生命，這十年間，她最深感受是連受惠的人也受影響。Abbie隨義工隊參與過多次「關懷長者心」地區安老服務計劃，接觸過不少受惠的獨居長者：「有啲長者間中會捐番啲錢出嚟添！話自己都唔知幾時唔喺度，好感動！仲試過探訪一啲長者屋企，有個風扇爛到用膠布貼住都話唔使換，飯煲好殘都話用到，叫我捐畀第二個有需要嘅人。」她特別留意一些隱蔽長者，更為了氹他們踏出社區，故找來一些長者義工：「長者引長者係最有效。」
文：名人組