王君馨踢爆老公追女招

王君馨（Grace）昨日出席奇華嫁喜禮餅活動，身穿紅色露背晚裝的她坐大紅花轎登場，其後又分享特意設計的餅卡，幸福滿瀉。將於7月11日在港舉行婚禮的Grace，表示當日會做齊向長輩斟茶等傳統儀式。

Grace自爆對老公Daniel一見鍾情，並分享浪漫相識經過：「十二年前我喺紐約一間餐廳做侍應，Daniel係客人，之後佢去望我嘅返工表，然後每日都嚟，喺度扮才子讀書，佢畀我嘅貼士又特別多。佢同番我講，當時好緊張，諗起我哋第一次見面都覺得好Sweet！」

老公唔畀性感

即將到紐約為友人擔任姊妹的Grace，計劃屆時與Daniel到兩人定情的餐廳拍婚照，而所穿的婚紗，會找專人設計，布料由巴黎空運到港，製作需時，她笑言老公不想其嫁衣太性感：「佢話唔好太性感，不過總之靚。」又指Daniel怕醜，故要他練習Chok樣拍婚照。

談到Q版公仔餅卡，Grace找來韓國畫家設計，並將過大禮，問她是否有不少婚禮贊助？她笑說：「好多人支持同祝福我，但都要問老公係咪OK。」

文：影視組