克勤偷步買飛益家人
李克勤相隔六年再踏紅館舉行個人演唱會，為怕家人搶不到飛怪罪於他，克勤自爆「偷步」特設「家人優先訂購制」！今次個唱主題是慶祝他入行30年，為配合熱鬧氣氛，拍攝海報當日他勁食七彩皺紙入口，搞到要頻頻出入廁所。
由英皇娛樂主辦的《李克勤成立三十周年》演唱會，將於9月5日至8日假紅館舉行，相隔6年再開個人演唱會，相信會掀起一片撲飛潮。本月底信用卡可以優先訂購，但克勤明目張膽表明會「偷步」，實行「家人優先訂購制」，他說：「為免今次又再唔夠飛，畀屋企人詐形。我已經喺兩個月前，開始做家人優先訂購，唔想再畀屋企人鬧，話個仔開騷，老竇都買唔到飛。」
多得Jan狂食皺紙
日前克勤為演唱會拍攝宣傳海報，為慶祝入行30周年，特別找來林海峰（Jan）任美術總監。阿Jan特別為克勤訂製了幾打紙炮，以七彩皺紙碎來營造開心的氣氛，最初大家試用紙炮，近距離向着克勤面孔發射，發出超大聲響，令克勤嚇了一跳大叫：「嚇死，耳都聾埋！」但紙炮散出來的紙碎不夠多，效果未如理想，最後阿Jan決定改用人力發射，拿水桶放滿紙碎，然後照頭淋或潑向克勤。克勤要笑住擘大口迎接，搞到食到大量皺紙碎，有時連鼻哥窿裏面都中招。拍攝期間克勤幾次舉手話要去廁所，他笑言：「食得太多皺紙肚痛要去屙返出嚟。」其實每次口中食到皺紙，他都想即刻入廁所漱口，因為皺紙甩色，搞到他覺得滿口五顏六色。
人有三急險失場
克勤表示楊老闆答應不惜工本為他打造一個讓觀眾嘩聲四起的製作，會把紅館變身萬人大派對，讓歌迷與他一同慶祝這三十周年。已於紅館做過百場演唱會的克勤，被問到今次演唱會可有新嘗試？克勤說：「其實好多嘢都試過，我連爆呔、人有三急去咗廁所，叫樂隊拉長少少前奏等我跑返來都試過，重有咩想試。其實我想試三面台，不過公司又話唔得，一定要四面台，否則肯定爭飛爭崩頭喎，咁今次又冇得試三面台囉。」
文：音樂組