胡杏兒獲老公錫肚 仔嚟o架！
現年37歲的藝人胡杏兒昨日宣布有喜，並已急不及待孖住老公飛往馬爾代夫度假，杏兒表示佗B不太辛苦，僅作嘔作悶，據知她一索得男已懷孕四個多月，一班「胡說八道會」好姊妹大表興奮，同聲表示等住做契媽！
胡杏兒與老公李乘德（Philip）結婚一年多，多次傳出有喜，每次杏兒僅表示努力中，至昨日母親節，她與老公透過社交平台公布喜訊，同時上載超聲波照片及正在馬爾代夫BabyMoon度假的靚相。照片中杏兒已微微見肚，但手腳依舊纖幼，Philip更親吻太太肚皮，畫面非常有愛！據知，杏兒目前已佗B四個多月，腹中胎兒更是男B。
作嘔作悶冇胃口
準媽咪杏兒昨日接受本報訪問，談起懷孕一事滔滔不絕：「揀今日講都係同老公商量過，咁啱係母親節，之前唔講得住呀，仲未夠三個月，加上老公都擔心，所以跟番傳統，依家順利度過，終於可以同大家講，好多謝大家嘅祝福！（知道係仔定女？）老公話等遲啲先問醫生，唔好咁急，佗B唔算辛苦，之前就有作嘔作悶，冇乜胃口，體重就暫時冇升好多。（預產期幾時？）到時我生你哋實會知啦！」
對於杏兒在「胡說八道會」中成為首位成員跑出當母親，一班好姊妹紛紛送上祝福，並齊齊等住做B仔契媽。
好姊妹等做契媽
胡定欣一早獲悉姊妹佗B，已守住秘密多時：「佢同老公一直想有小朋友，如今終於得到呢份禮物，好戥佢高興。（做契媽？）個個都爭住做，不過都唔使，仔定女就留番畀佢自己講，我哋會繼續保守呢個秘密。（教姊妹點進補？）唔使教，佢家姐有三個小朋友，呢方面可以話經驗充足。」姚子羚則爆早前杏兒拎住BB超聲波照向他們宣布喜事：「我哋準備好做契媽，咁首先當然係胡蓓蔚啦！」胡蓓蔚則說：「好替佢兩公婆開心，我榮升大契媽啦！」而黃智雯戥對方開心：「佢哋一直好想有小朋友。（有傳你結婚喎！）都有呢個可能，個個都有可能，有幾位都未結婚，子羚、定欣都有可能，非常之大機會嘅。」李施嬅則笑言，望與姊妹們一起上湊仔班。
文：影視組